暑假因为同同学去咗scnu搞嘢，所以喺scnu食咗几餐，虽然比上次scut停留时间长，但係由于时间关系，食嘅次数反而比较少。 因为唔係日日咁去，所以以下我就唔按上次scut嘅格式，只係大致咁写一下scnu嘅饮食考（察）研（究）了。

最先食嘅係陶园 。陶园嘅另一边连住嘅好似係第一饭堂，不过我冇去过。陶园入面品种都比较多，但係好逼好窄，取食区贴住进食区，搞到冇乜空间。最离谱嘅係喺快餐台嘅旁边地下竟然有坑渠盖，就係马路边长方形大大个一条条铁条果仲，虽然用咗报纸冚住，但係坐喺旁边，甚至就係喺脚下，叫人点样安心进食？另外一样离谱就係冇洗手间，冇就算啦，咁都应该有俾人洗手嘅地方挂？一样冇，我问果度嘅工作人员，竟然指我入厨房。我行出陶园揾一样揾唔到水源，饭前唔洗手，咁样嘅饮食条件，点样保证卫生？

陶园正门。楼上好似係中餐餐厅。

至于陶园嘅质素，见到咁嘅环境，我剩係食过一餐，价钱唔便。我食咗碗所谓海鲜桂林米粉，啲米粉煮定太耐了，谂晒，一啲都唔好食，汤底又淡，简直严重低于出边一般大排档水平。而同学食咗个碟头饭，反映餸菜价格冇标准，而且据我目测，质素亦唔好得去边。另外，陶园食完係要自己扫骨回收餐具嘅。潲水桶就喺买饭票隔离嘅入口处，出入必经，有几个姐姐守喺果度，有时果几个姐姐都会出动处理一啲食完不顾而去嘅人嘅餐具。好彩另一头后面有个细细嘅后门，可以方便果啲唔想扫骨嘅人从容离去。

之后我哋发现再向前行一段路就去到落成啱啱一年嘅沁园。沁园饭堂部分有两层，我去嘅几次一楼都冇开过，都係去二楼，而一楼仲有烹饪班，见到成班着晒白衫戴晒厨师帽嘅人一齐喺到整嘢。

沁园正面外景 。湖面上嘅係（约）六曲桥，实际有几多曲，我特意上去行过数过，但係唔记得了。初时喺远处剩係见到主要嘅两曲，所以开始嘅时候我叫佢做两曲桥或双曲桥。

曲桥旁边嘅拱桥。将过多依啲桥类建筑起得咁近，令人觉得好怪。喺桥到向曲桥果边望风景仲可以，但係按依张相嘅方向望，视野即刻俾跨过湖面嘅电线影响，再远啲就係一啲残旧嘅建筑，简直大煞风景。至于湖面上都有啲垃圾，不过唔係太多，上图入面湖面原先有啲胶袋之类嘅垃圾，俾我处理咗了，不过湖面嘅警告牌就比较碍眼。

曲桥旁边嘅拱桥。将过多依啲桥类建筑起得咁近，令人觉得好怪。喺桥到向曲桥果边望风景仲可以，但係按依张相嘅方向望，视野即刻俾跨过湖面嘅电线影响，再远啲就係一啲残旧嘅建筑，简直大煞风景。至于湖面上都有啲垃圾，不过唔係太多，上图入面湖面原先有啲胶袋之类嘅垃圾，俾我处理咗了，不过湖面嘅警告牌就比较碍眼。

沁园嘅设施仲係唔错嘅，有中央空调，环境干净卫生，大大块嘅玻璃窗，而且有天窗帮助采光，令到饭堂入面好光猛。不过都係scnu最爱，所见唔觉有卫生间，而洗手嘅地方剩係得一楼楼梯底有两个洗手盘。不过排队情况唔严重，一般唔超过5个人排队，亦好快轮到，唔同scnu啲人食饭唔兴饭前饭后洗手？ 虽然饭堂外面有唔错嘅湖景，但係由于二楼饭堂始终都係太矮，剩係得靠窗嘅位置可以眺望湖景，至于入小小嘅位置，就剩係可以眺望湖对面嘅宿舍了。

所见嘅係沁园楼梯上方嘅大型LED介绍牌，
不断滚动介绍饭堂内嘅膳食种类以及西餐厅为
庆祝沁园一周年举行嘅便价自助餐，三十几蚊
就有好多嘢食，种类比美4星级酒店内200蚊左
右嘅自助餐。不过实际係点，因为举办时间係
我开学后，我就冇去了解到了。

沁园二楼饭堂内观（相片经处理）

沁园取膳区同进膳区分隔得比较开，感觉上舒服好多，喺一角有专门嘅教师进膳区，冇乜特别，只係划开嘅一个区域，就好似美心快餐嘅员工进膳区咁。上图所见嘅係饭堂中间部分所用嘅台凳，而靠窗嘅一排台凳同依啲係唔同嘅，凳嘅靠背係倒三角形嘅。所有嘅凳都唔係同台相连嘅，可以自由移动。饭堂入口处嘅一旁有好多凳放喺到，如果多几个人去，可以随时好方便咁加凳，唔使好似其他学校饭堂咁去人哋台“偷凳”。饭台嘅下面四个角都有一个钩，可以用嚟挂住书包，节省咗好多空间，又唔使浪费座位，小小设计，令到进餐舒适好多。

沁园饭堂嘅种类都几多，有即点即炒嘅小炒，不过依样原先好多学校饭堂都有，都係做唔长时间，唔知佢可以坚持几耐。有粥粉面，拉面拉肠，碟头饭，煲仔饭，老火汤，甜品有红、绿豆沙，龟苓膏等等等等。

喺靠近教师专区果度有个自选区，除咗好似其他学校嘅自选饭堂咁有一碟碟餸一碗碗饭自选之外，亦有一碗碗汤，依啲汤唔係免费嘅，仲有水果可以自选，而且饭分开咗大碗同细碗，咁大食嘅就唔使攞两碗饭咁麻烦，一大碗过就得了。依度价格比较适中，不过由于油菜係8毫纸，所以如果你冇饭卡买票嘅话，攞油菜就好难齐头数了，不过收银嘅哥哥好好人嘅，你面露难色，佢会叫你下次嚟食补返，其实就係叫你唔使了，明知冇饭卡嘅都係外来人员，又由几何食第二次呢？依度嘅碗碗碟碟都係不锈钢嘅，所以啲餸菜冻得好快。基本上自选果度嘅饭餸质量唔错，汤都几好（只係滚汤，唔係老火），只係餸嘅种类好似并唔係好多。

自选嘅果度有时唔会开，隔离有碟头饭嘅窗口，不过餸菜质素就差好多，质素差咁多但係价格就同自选差唔多，感觉上係抢钱嘅垃圾。 啲餸都唔知点入口，而啲饭就一够够，都唔知点食。碟头饭有汤送，不过比较一般。可能係我一向对单格饭盒（冇分开饭格餸格）同碟头饭依类饭餸捞埋一齐嘅中餐冇好感，所以有偏见。特别特别最憎食饭捞汁，饭餸汁捞埋晒一齐，简直好似潲水咁。

卖相较差嘅碟头饭。左上角嘅係龟苓膏，只售一蚊，不过感觉上好似啫哩咁好软。

之后我试过拉面，同陶园果啲比好好多了。起码佢有汤底，啲汤算有味。拉面有几种配餸可以拣，比其他学校饭堂种类稍微多啲。不过仲係犯学校饭堂拉面嘅通病，好多冇拉成面条嘅面团面块面片都一齐煮。食落觉得比我食开嘅jnu第五饭堂拉面好啲，口感清爽好多，算有一定性价比，不过一碗拉面係唔够饱肚嘅。

沁园饭堂嘅匙羹都係不锈钢嘅，喺固定嘅地方集中放住任攞，好似喺M记同KFC攞饮管咁。不过筷子就冇提供，剩係得少数嘅面食窗口、煲仔饭窗口有少量提供一次性筷子，而且好多时係你买一碗面，厨师亲手递一双俾你，冇乜机会可以大量攞到，所以搣开嘅时候就要小心唔好搣烂了。至于沁园全部采用不锈钢餐具，可以禁用啲，冇咁容易打烂，不过就唔利于保温。

潲水倾倒同餐具回收处

沁园仲係好落后，食完饭要自己扫骨。scnu啲女生认真鸡手鸭脚，我去倒咁多次，几乎次次都差啲俾啲女生溅到。不过到潲水果到有个姐姐都几好人，我喺旁边将啲剩饭餸倒埋一齐准备一次过倒，佢好主动咁攞过去帮我倒同埋放返啲餐具。另外我好惊讶，虽然果度嘅筷子使用量好低，但係啲筷子连埋啲剩饭剩餸一齐倒落潲水到，我好惊啲猪食果时会唔会俾掺趁个嘴或者食落肚吉穿个胃。

沁园二楼饭堂一角嘅西餐厅门口。听同学讲
入面嘅价格比较公道。但係因为我就唔啱时间，
所以冇入过去试。

沁园买饭票柜台嘅果啲人都好叻，话买两个六蚊，佢俾一张十蚊同一张两蚊嘅饭票俾你，咁万一我哋分开食唔同窗口嘅嘢点办？

国营××××大学粮店。好惊讶喺沁园隔离见到国营粮店。

一间称有舞厅卡拉OK嘅餐厅，不过外观好旧好荒芜。

今次嘅scnu饮食考研就到此为止，都係果句，由于时间有限，未能一一尝试，可能会导致以上评论过于主观。

亦係果句，以上只係作者个人主观意见，所有观点与本站立场无关。

• 0 Comments

暑假因为同同学去咗gdut搞嘢，所以喺gdut食咗几餐，虽然比上次scut停留时间长，但係由于时间关系，食嘅次数反而比较少。 因为唔係日日咁去，所以以下我就唔按上次scut嘅格式，只係大致咁写一下gdut嘅饮食考（察）研（究）了。

由于我嘅活动范围局限于主校生活区，所以剩係试咗下果度嘅部分饭堂。 生活区嘅食肆主要由北院壹食堂（二楼北苑餐厅、三楼bar）、北院贰食堂同埋一啲大排档组成。

最开始嘅时候，因为仲係暑假中段，所以之前一路听同学盛赞嘅北苑餐厅仲未开始营业，而我对北院壹食堂嘅环境又十分恐惧，因此喺大排档食咗餐，bar食咗餐，之后北苑餐厅开始重新营业了，就食咗几餐，后尾gdut龙洞校区啲学生搬返嚟gz校区了，人太多了，我哋又去返bar食咗餐，后尾觉得bar太差，都係喺北苑餐厅简简单单搞掂就算了。

由于gdut喺到新建学生宿舍俾龙洞校区返嚟升大三嘅学生，所以喺北院壹食堂同埋阴暗角落嘅大排档都充斥住好多民工。北院壹食堂喺一楼，可能原先设计就并冇谂住搞堂食，所以座位好少，而且门面太大了，同饭堂嘅宽一样咁大，而饭堂唔係好深，入去小小就係取食区，所以导致座位成为狭长嘅打横一条。由于咁嘅布局，食饭就对住晒敞开嘅门口，简直就好似露天喺街边食饭，亦由于狭长嘅进食区俾狭长嘅门口同狭长嘅取食区夹住，所以有好多人流穿梭，见到咁嘅环境，我宁愿唔食了。唔好话有冇舒适嘅环境啦，卫生清洁嘅环境都未必可以保证。

深处阴暗嘅大排档（相片右侧阴暗门口），入面聚集唔少民工。相片左侧嘅楼梯通上去北院贰食堂。（相片中各招牌经处理隐去）

见到咁嘅大排档同北院壹食堂，我哋拣咗望落去相对光猛卫生嘅一间叫做“开×冰”嘅大排档。同学要嘅係炒饭，我要咗个龟苓膏同牛丸米粉。龟苓膏係预先做好喺雪柜入面嘅，比较一般。而牛丸米粉就等咗好耐，催佢佢先话唔记得咗，搞到我好谂咁闹鬼佢，咁样嘅服务质素认真太差了，结果搞到我最先嚟最迟上到最迟走。米粉质素认真差，如果唔係匿埋喺学校入面，叫佢同街边嘅大排档一齐做，我谂佢即刻执笠都似。首先啲汤水简直就係滚水，一啲味都冇，透明嘅，啲米粉就极其生硬，我真係好耐冇试过啲咁难食嘅嘢了。一个同样食牛丸米粉嘅女嘅甚至好嬲咁叫佢攞盐出嚟，喝佢：全部放落去啦！一啲味都冇！

开×冰（招牌经马赛克处理），竟然仲有人去食。

食过啲咁差质素嘅嘢，我哋就之后都唔去果度食了。第二餐我哋改咗喺北院壹食堂三楼嘅you & ** bar食。

you & ** bar喺楼梯转角处嘅霓虹灯招牌（招牌经马赛克处理，即“**”代表嘅果个单词被隐去）。

依间bar装修一般，最突出嘅特点就係服务质素极差，简直係我咁大个仔食过嘅服务质素最差嘅一间食肆。首先，上嘢又係超慢，有啲容易整或者整定嘅就好快，另外一啲就超级慢，我要个海鲜炒乌东，竟然等咗45分钟，我闹佢佢先上，仲要上错汤乌东，我再闹佢佢先上啱。去到果度基本上你嗌几次果啲waitress都唔会嚟理你，唔会攞menu嚟俾你，所以有啲食惯嘅人都识得自己去柜台攞menu或者埋单。有学生仔去柜台问点解上得咁慢，其他迟嚟过佢哋嘅人都上咗了，结果柜台嘅waitress竟然态度好恶劣咁答：“唔等得就唔好食啦！依度又唔係快餐店！唔好成日烦住晒！”又有一次我同同学埋单果时，个waitress竟然用命令嘅口吻同我哋讲：“俾散纸啊！”真係好无礼，我都唔知依啲八婆waitress边到请返嚟嘅，毫无素质，仲衰过街边嘅飞女。至于依间bar嘅价格同好多寄生于校内同学校附近嘅bar一样都係好便嘅，食物质素只係一般水平。食嘢有一杯所谓冰红茶或者冰绿茶送，其实就係冻嘅红茶或者绿茶入面落糖，係一细杯，饮完佢唔会主动加俾你。另外周六日有特价食品。不过去依啲地方都唔知係食嘢定係受气，所以我并唔中意。

北院壹食堂，二楼北苑餐厅外观。

终于等到二楼北苑餐厅重开，我哋就即刻转移阵地。北苑有中央空调加风扇，但係由于座向问题，中午坐窗边会晒到。除咗一般嘅快餐台凳之外，都有几张铺有台布嘅大圆台，亦有好似酒楼咁嘅房。喺进膳区有几个waiter同waitress负责扫骨，佢哋都着晒好似酒楼食肆咁嘅制服，不过都有好多学生可能由于习惯，食完主动自己去收拾餐具扫骨。

北苑入面食物嘅种类比较少，主要有碟头饭同埋粉面，亦有烧腊橱窗。喺北苑嘅入门处有一个玻璃橱，摆晒当日有售嘅碟头饭样板出嚟，不过睇嚟佢唔係好识做广告，可能係为咗唔浪费，好似吊烧鸡肶饭咁（改咁嘅名，同学一般都将“吊”字读歪晒音），佢摆出嚟嘅样板拣咗只好细好细只烧得好黑嘅鸡肶，太唔注重广告效果了。唔同嘅碟头饭价格由6～8、9蚊不等，虽然饭堂入面有好几个取膳窗口，但係提供嘅种类都係一样嘅，不过确实可以减轻人流，唔使排咁长龙。

豉油鸡碟头饭

好多碟头饭嘅餸原先都係冇汁冇味嘅，啲餸放上饭面先淋汁，唔同嘅餸淋嘅汁都係一样，但係啲餸就一样係淡而无味，特别係乜嘢烧排骨，简直就係煲完汤嘅排骨。食过咁多款碟头饭，真正可以送饭嘅可能就剩係得叉烧饭同白切鸡饭了（佢唔係叫白切鸡，而係叫得好奇怪嘅，不过我唔记得了）。粉面一般好少人食，所以好多时都唔识排队，而煮粉面果度有个肥姐姐就好好人，好亲切，佢煮嘅桂林米粉好好食，汤底适中，牛腩够谂，配菜都好靓，建议大家可以去试下，而面同河粉就因为我个人喜好问题唔係好中意。

饭堂嘅汤係免费提供嘅，汤碗同匙羹喺消毒碗柜入面自己去攞，送嘅汤质素可想而知了，而装汤嘅桶旁边有豆豉豉油辣椒同咸菜免费提供，果啲辣椒真係好正，我係攞汤碗去装嚟送饭嘅（冇办法啦，鬼叫啲送一啲味都冇咩）。不过辣椒同咸菜咁样冇遮冇掩摆出嚟，我比较担心卫生问题了，所以我都剩係食过两次，之后见佢好似係前几日一路剩落嚟嘅，我就冇再去攞嚟食了。

放汤嘅桶。木台上面嘅两个不锈钢盘就係豆豉豉油辣椒同咸菜了。埋边靠墙嘅果个盘放嘅係咸菜，开边果个盘放嘅係豆豉豉油辣椒。（相片经处理）

饭堂内景（相片经处理）。

北苑係我食过咁多饭堂窗外景观最差嘅一个，唔单止冇湖景，连草地花圃都冇，剩係见到凌乱嘅宿舍工地，混乱嘅大排档同士多仔，残旧嘅女生宿舍，邋遢嘅路面，仲有门外嘅马路，真係冇眼睇，唯有专心食饭。

二楼北苑餐厅窗外风景。转角果度招牌一边係红色果间係装修梗嘅招商银行。

为从龙洞校区返嚟gz校区升大三嘅学生新建嘅宿舍。

至于北院贰食堂我一路都冇去过，剩係差唔多最后有一次行过上去睇，一条唔显眼嘅楼梯上去，先发现另外有条大楼梯，落返嚟见到原嚟北院贰食堂都有一楼部分，不过北院贰食堂嘅环境睇落同北院壹食堂差唔多，见到我都唔敢食了，同学点劝我我都坚持要离开。

今次嘅gdut饮食考研就到此为止，都係果句，由于时间有限，未能一一尝试，可能会导致以上评论过于主观。

亦係果句，以上只係作者个人主观意见，所有观点与本站立场无关。

• 0 Comments

■说明：由于本文仅为作者个人对其本人的主观小结，为免大家对文中所涉及单位产生不当的误解，所以文中所有单位的名称均被隐去或仅为化名，作者不对读者的自行臆测所造成的任何弯曲误解负任何责任！■

同以往一样，学期初都几积极上进，周围去报班，将全部选修课都试听咗几次，连晚黑追开嘅连续剧『無頭東宮』、『法網伊人』都放弃咗，连卡通『星際漫遊YA YA YA』嘅大结局都错失埋。结果最后因为自己上一学期相关嘅基础科目欠佳，而且难以应付过多依啲较难嘅科目，所以放弃咗，改选咗啲老师好人内容简单嘅科目。

一开学就已经为咗选课嘅事搞到烦晒，忙咗一大轮。之后密密麻麻嘅课程加埋懒个唔叻学人去搞认证，结果真係攰到冇晒办法，自己读书又懒，果啲靠认真理解、数学基础嘅科目攞起几次都係唔明，最尾唯有放弃，结果到咗学期尾就应付唔嚟了。

学校都好耐冇出过乜嘢新闻，其他高校都搞咗几单跳楼自杀、落水溺毙嘅新闻见报，而我哋学校对上一单跳楼已经係放假果时嘅事了，至于学费问题爆发嘅示威事件亦被学校平息，只係喺网上炒咗一轮，并未见报。我哋学校又点可以输蚀俾其他学校呢？话晒市内一只手点都可以数到我哋学校，终于最尾喺期末考搞咗啲全国首创、被传媒誉为“壮观”嘅事件嚟争取咗曝光。

期末考开始后第二日某晚报刊登嘅新闻。

考试第一日当晚GZ电视台新闻亦播出咗当日嘅情况。

当晚电视台新闻播出嘅考试场面，被评为“壮观”。

咁样嘅考试环境确实唔错，空调够劲，光线够猛，台凳够新，空间够宽阔，只係因为体育馆入面喺木质篮球场地板，监考老师又多又中意行嚟行去，结果搞到成日“卜、卜”声好大声嘅脚步声，烦到死，影响晒我哋考试。

听讲考试嘅第一日会有好多记者嚟采访，结果当日剩係见到一个记者喺考场影相，之后考完见到GDTV嘅记者喺到拍我哋攞返考前保管嘅书包。

班记者都唔知采访乜嘅，剩係识影我哋点样逼法去攞书包，剩係识话壮观，唔识得话分析下咁多人嘅考场退场嘅时候剩係开一个门，结果搞到几逼；咁多人考到鬼咁攰，去攞书包仲要咁鬼逼……

电视台记者采访校长

基本上喺边到考都係一样嘅嗟——我起先谂。同时，李铁嘅广告亦不断咁喺电视上面播出：“边到都係主场！”，深入人心（结果证明衰咗）。一开始考场环境确实令我觉得可以舒服咁考试，但係最弊嘅係，佢係唔同科目隔开坐，隔就隔啦，但係佢就係都要学小学、初中咁，两个人两张台拍埋嚟坐，好似喺到话：“俾你哋坐埋一齐睇啦，不过唔同科0架啵，吹咩？”咁。结果之前几科我身边嘅都鬼咁强，死咁答题，简直冇停过笔，而我依边，基本上15分钟之后就将全卷识做嘅都做晒了（因为根本冇几题识做），已经开始停晒手，睇住身边果位咁多嘢写我又唔好意思咁快停手，唯有又重头将啲睇得明题目嘅求其作啲答案落去，点都剩係用多15分钟。通常同我哋搭配坐嘅都係文科或者医学院嘅，啲答题鬼咁多嘢写，而我依边就停晒手，就係因为咁，影响晒我考试嘅情绪，搞到我鬼咁紧张，结果考衰晒。好彩，我喺体育馆考嘅最后一科身边果个好屎，做咗一阵就趴低瞓觉，结果搞到我就源源不断咁答题，成为我喺体育馆入面考得最好嘅唯一一科。

虽然体育馆考场好似好严咁，其实啲老师同果啲学生都好熟，并冇乜严肃嘅感觉，啲监考老师同啲考生都好配合，对于果类学生嚟讲就真係“边到都係主场”了。

（原『学期末小结』大幅删减版）

• 0 Comments

虽然题目写係“之一”，但係係冇“之二”篇嘅，关于“之二”，可以参照news入面，搜索“考试发烧友之二”关键字。因为写咗“考试发烧友之二”，所以我先写依篇想写好耐但係又懒得写嘅“之一”。

其实基本上我考趁试都会病，从小学一年级第一个期末考开始我就係发住烧去考试。果次数学100，语文唔记得係99定係98，就係错咗一题填字题，要填“__火车”，我填咗“关火车”，正确嘅当然係“开火车”啦。班主任笑我病懵咗，我依家觉得我唔係病懵，係我自己太蠢嗟。

之所以叫“考试发烧友”，係事后同学知道后帮我改嘅。当时係大二学年期终考，即係放暑假前嘅果个第二学期嘅期末考。最后一科考试同之前一科考试相隔五日时间，我谂住都係唔好咁早开始复习了，因为我份人记性唔好，费时太早复到时唔记得，点知当我准备开始复习果时我就中咗流感了，之后仲发埋烧添。

因为真係烧得好犀利，我半夜烧到热醒咗（之前一日冇察觉有烧），就自己去整湿条毛巾嚟敷 （当时我只係觉得好热，开住空调都咁辛苦，唯有敷下啦，完全冇发烧依个概念），结果等到朝早起身先探热，发觉烧到39度，阿妈即刻带我去诊所睇，果日好似係星期六，诊所嚟我屋企话远唔远话近唔近，都大约成两个站，我脚步浮浮咁先行到去，点知诊所竟然冇开门，问看单车摩托车嘅阿姨，佢话诊所休息，damn，认真白行。当时并冇谂过去大医院，剩係谂住就近就医。阿妈就唯有带我去药铺睇下有乜药兼夹俾药铺嘅坐诊医师睇下。去到市场旁边嘅药铺，我病到烦晒，唔想买乜药食了，医师又未嚟，我唯有坐喺到等，阿妈就去隔离嘅货仓超市（顺民城）买饮料俾我，好似係清凉茶挂。结果医师成九点几先嚟到，啲家长一番推推让让边个睇先，结果都係我睇先。

医师係个阿伯，一嚟到坐低就先除咗对凉鞋，不断用手拗脚。俾咗探热针俾我探热，阿妈话我烧到39度，结果佢一睇探热针，就话：哗，烧到40度啦。我谂一定係白行到诊所累0架啦。跟住佢就用佢果双同佢嘅脚亲密接触过嘅手同我把脉，阿妈话我听日要考试，希望可以尽快退烧，佢哋以为我係高考，我哋解释一番佢先明我係大学入面嘅考试。结果佢开咗退烧针同埋消炎针俾我打，执咗几剂中药俾我。我话：医生唔打针得唔得啊，佢哋就梗係话：打针快啲好啦。不过其实佢哋係话：咁大个仲怕打针？

打针嘅问题嚟了，我好疑惑，边度打针啊，我好快就知，係原地打针。医师老练咁用砂轮界一圈装针水嘅玻璃樽嘅樽头，用药酒抹一下界痕，跟住用手一拗，“卜”一声玻璃樽就开咗了，用针筒吸咗针水，再用针头插入药粉嘅樽注入，一番混和之后又吸返就搞掂了。睇玩阿伯嘅表演，我都係时候转身除裤露臀了。医师就诊嘅台就摆喺药店门口，药店门口正对人车混行嘅大街，加埋一大班病人（基本上係小朋友）同埋家长和蔼可亲嘅目光同埋笑盈盈嘅“鼓励”下，我承受住极大压力完成咗两针。

返到屋企瞓喺床上，谂住听日考试了，点都睇下书了，睇咗一下，谂到其实我期末考只要考到50分就pass了，结果都係放弃。（该学期嘅依科由复变函数同埋特殊函数组成，复变函数期中考已经考咗，加埋平时成绩换算出嚟我得65分，占总评嘅60%，再根据如此运算，期末考占总评40%嘅特殊函数我只要考50分，加埋平时成绩，我依科就可以过了）

第二日我去考试前探咗下热，38度，好，坚持。我打咗部的士返学，果条的士佬真係好蠢，原先我谂住打的途中可以睇下书，点知条友唔识路，我一低头睇书，佢就同我讲：你睇住路啦，唔好过咗龙啊。佢连黄埔大道隧道都唔识行，结果嘥咗两个红绿灯口，我damn！

考试都係咁啦，我有一半嘅题唔识做，仲要唔包括撞果啲，其实果啲都係老师讲过0架啦，只要睇下书都OK嘅了，可惜我就係冇睇或者随便睇咗下冇晒印象。我做完识做嘅之后就扒低瞓觉了，真係懒得作弊了。

最后钟伯（即係我哋果科嘅老师）俾咗我总评61分，真係俾到尽晒，不过都算啦，合格我就满足0架了。

后尾发觉，其实好多同学考试都撞啱发烧，不过唔知点解佢哋点考都係咁高分，搞到我有啲惭愧添，可能都係天资问题挂～～

• 0 Comments

高二下学期（注：“高”指高等教育学府）考四级之前，一日搭梗车返学上图图嘅复习课，ZSU嘅F（注：“F”指friend）phone我问我报唔报新×方嘅六级英语班，我对依啲冇乜所谓，就话好啦，第日个F就搭咗我去报名（坐单车尾^_^），当时名额都已经报得七七八八了。我好少咁大步，做定咁长远嘅计划。因为当时就快期末考，所以好紧张，而且又未考四级，唔知会考成点，个六级班又暑假先开波。不过有人陪，就当係暑假嘅消遣啦。

课程上足四周，暑假几热0架，不过佢係晚黑先上，所以都OK啦。第一节课我就迟到了，因为第一节按惯例係免费，所以鬼咁多人去“试听”，我剩係可以担咗张凳坐喺最后，不过好在坐正喺柜式空调前面，可以用嚟挨背脊，又凉爽，所以都冇所谓啦，以至中间落课休息，工作人员叫我坐去前面啦，我都懒得move。就係由于依次迟到冇位坐，所以第二晚虽然落雨我都好早去到；就係由于上次迟到冇位坐，所以我唔清楚点样按号入座，拣咗个正位，仲帮个F霸多咗个位，结果俾个位嘅真正主人——一个女嘅赶，真係瘀到痹。由于报名迟，我个位都几后0架，我嘅正前方仲有条柱遮住咗讲台，剩係可以睇十米开外嘅黑白电视。都冇所谓啦，其实依啲课都係听为主，黑板板书冇乜好睇，啲女老师又贞子咁样超长头发，加埋通过唔清唔楚嘅电视黑白影像映出嚟，真係贞子续集咁。我四周坐嘅都係啲肥妹，有节听力课，坐我左手边嘅肥妹问我，点解个无线headphone冇声出嘅？我初时好不屑，以为佢依啲人一定係蠢到连开关都唔识开，后尾发现，原嚟佢係冇放电池，唉～～

基本上成百几人一间课室，台凳分开两边两个大方块摆放，剩係得中间一条通道，而且台同凳之间嘅空间好窄，而我又坐喺靠通道嘅第二个位。所以如果早去到坐低，就要成日起身，俾啲人入去，落课又要起身，俾肾差啲嘅人去厕所，起身坐低、起身坐低，咁唔方便嘅日子，真係几烦0架。不过几节课后，我就坐咗去个F果边嘅位，因为佢报名时间同我唔同，先过我报，所以坐喺我隔离方块嘅同行比较边嘅一个位，而且佢隔离可能退咗班，所以冇人坐。果个位係最边嘅了，我左手边嘅一个位冇人坐，再左就係墙了，头顶前面係音箱，左脚嘅位置係条大水管，都唔知点放脚，听力嘅时候，如果唔将头向右侧10cm，无线headphone就收唔到信号（唔怪得冇人坐）。不过都好啦，坐最边，唔使起身俾人行，又可以同隔离倾谒，算OK了。仲见到两个高中同学，有个识得嘅、剩係同我同去嘅F打招呼而冇理我嘅，同埋有个见到我认出我但係冇同我打招呼相认嘅……

我觉得新×方啲老师真係太低B了，成日上课讲埋晒啲唔好笑嘅笑话，但係唔知点解其他人个个都笑到死死下，反正我就觉得佢哋所谓嘅幽默太无聊、太尴尬，而且全部都係新×方北京总部培训出嚟嘅统一笑话，期期班、节节课、个个老师都係讲果啲相同嘅无聊笑话，而且错漏百出，如果唔係我细胆，我实大大声驳佢。好几个老师都係隔离ZSU嘅研究生，其中有个肥佬老师最无聊，上课成日话自己暗恋另外一个同我哋上课嘅长发女老师，不过女老师出国了，佢好唔开心——咁样啲嘢当笑话嚟讲，嚟氹啲学生笑，佢真係够晒无聊了！另外，啲老师除咗批发咗啲笑话之外，仲批发咗啲令我之后都好反感嘅口头禅：（注：以下普通话）牛人、土人、郁闷、血晕当场……

课程基本上一般辛苦，几节课后我就冇搭公车改踩车去了，主要唔使逼车兜路、易就时间同埋费事走嘅时候要人搭去车站。上课都係倾谒、开小差，佢上课讲嘅比较多係叫我哋做真题然后讲解，比较实用嘅就係讲考试技巧果啲同埋派嘅一份考试做题技巧连填空式作文嘅得几页纸嘅讲义。接近尾声嘅六级模拟考我就冇去了，主要唔中意考试，就同屋企人入咗南海探亲戚。以前高中啲人仲好意思话依家啲中学係应试教育，其实新×方依啲先至係真正嘅应试教育。

佢哋发嘅一本书，成三百几页，接近2cm厚，内容都係介绍佢哋嘅一啲老师、学员嘅事迹，我觉得根本就係炒作，或者係佢哋CIS嘅一部分。

发嘅一本笔记簿，开头有两页佢哋嘅广告，基本上纸质都唔错（都係我哋自己出钱嘅啫），首页同埋每页嘅页眉都写住佢哋嘅校训“从绝望中寻找希望，……”，哇，用佢俾人睇到，未俾人以为我好唔掂？！其实开课初啲老师都成日强调依条校训，好似我哋嚟上课係因为捞得好唔掂，个个走上绝路，走投无路，唯有嚟佢依度“寻找希望”咁，咁绝望真係死咗佢算啦，仲揾你～～？

课程尾段，四级成绩终于公布，我终于唔使去报英语四级班，而且悭返唔使考口试（唔係反话嚟0架，主要係因为我实在太屎所以冇所谓）。之后由于唔使报英语四级班，所以我哋就报咗寒假嘅T班，真係几早报0架，我哋落课去踩场（当时英语六级班仲未完），睇过啲位真係几前0架，只不过边咗啲。不过寒假由于一啲私人嘅原因，最尾都係退咗依个攞嚟托嘅班，后尾听讲好多以前高中同班嘅同学都去咗上呢个T班。

讲返正题，一个学期后（因为要到一月先有英语四六级考），喺前后几日全部都係期末考嘅夹击下；喺一个学期完全冇掂英语嘅情况下；喺完全冇背单词，30题词汇题完全靠撞嘅情况下，我过咗六级（ 因为我英文真係好差好低分，所以冇乜值得show off，但係我都show off咗）。

• 0 Comments

我喺大二下学期去咗scut金工实习，之后每日喺chinaren校友录发表scut嘅饮食考察连载，以下係我喺chinaren贴嘅原文。我喺依度对原文嘅一啲错误作咗修正，将一啲名称隐去，并将一啲过于偏激嘅言论修改删除咗，另外重新续写咗一部分。

以下为编辑后嘅原文引用～

01-10-15 23:23

scut饮食考察之第一日：美食广场建筑残旧，饭粒坚硬松散、蔬菜煮唔熟、肉类过肥过咸、粟米仔比粟米仲要老。送嘅茶有药味，汤水纯斋。优点：汤有放盐；有纸巾送；价格低（但同质素成正比）。最大弊端：冇专人扫骨，要自己倒。二楼餐厅：价格媲美绿茵阁，质素差过管理员街口嘅大排档。优点：虽然当时入面拍乌蝇，但係知客全天候迎宾，礼貌有加；有空调；茶位便，服务员加茶积极（可能係因为当时太少客人嘅缘故）。

01-10-16 18:02

scut饮食考察之第二日（A）：今日到咗寻日二楼餐厅嘅一楼，即湖滨厅，发觉：冇空调、风扇唔拧头、人太多、台与台之间冇空位，简直闻到台对面果条友嘅臭脚味，收碟推车都係喺人与人之间逼过，环境恶劣之极，而且有电视都唔开，搞到啲学生吃饭睇报纸。

01-10-16 18:10

scut饮食考察之第二日（B）：跟住係考察第五膳堂。分为三个部分，一般嘅饭堂区：台太大，有8人长台，我认为饭堂嘅台大小应控制喺4人为适合；买饭嘅地方好似市场摊位。北方厅：同样冇空调，环境较好，食物颜色较暗哑，疑唔新鲜。快餐厅：终于有空调了，而且係中央空调（但係其实面积唔大，冇必要用中央），天花太低，比人压抑感。食物一般，环境好。第五膳堂三部分之间仲有老翻卖，价钱合理。

01-10-16 18:15

scut饮食考察之第二日（C）：专家楼西餐厅：装修好，服务全，逼近绿茵阁环境。西餐全套都只係30几蚊。缺点：门口一段路冇树，行过去好晒。由于笔者今日出智慧牙好疼，冇乜胃口，所以对以上三个地方食物质素暂不作过多评论。

01-10-16 18:18

scut饮食考察之第二日（D）：赞：校园价超市真係比较平，达到咗一般生活小区内嘅货仓式超市价格，想勤工俭学嘅话可以去入货再攞出去卖都可以赚到。

01-10-17 18:02

scut饮食考察之第三日：（A）：今日继续考察第五膳堂，我哋选择咗快餐部。今日天气唔冻唔热，结果佢就冇开冷气，有降低成本之嫌。饭送好平，质素仲可以。油菜识得切段，其他餸同米饭味道可以。汤好大碗，有极少嘅免治肉浮面。窗外湖景OK。缺点：好多只瓷羹喺右手使用时靠嘴嘅一边都係崩嘅；冇电视；饭台太长，坐起身显拥挤。赞：“监狱饭盘”嘅每一个凹位深度足够，使到饭送唔会因为堆得太高使进食唔方便。

01-10-17 18:07

scut饮食考察之第三日：（B）：今日喺第五膳堂快餐部食饭时偶遇peipei，结果我忍住智慧牙之痛友善咁向佢招手，佢竟然唔认得我，睇嚟我经过智慧牙嘅生长使面形改变咗唔少。

01-10-17 18:12

scut饮食考察之第三日：（C）：喺scut入面发现咗一间雪贝尔，果然好方便（scut校区咁大都好应该啦），可惜品种较少。另外，有100蚊一对嘅CONVERSE帆布鞋（好似有Pro Star同One Star），可惜未能分辨真伪。

01-10-18 18:15

scut饮食考察之第四日：（A）：今日我继续考察第五膳堂快餐部，佢哋今日唔单只冇开冷气，连灯都唔开。饭送都算OK，汤係紫菜煲蛋，係校园饭堂常见嘅汤，但係做得确实比其他学校好。

01-10-18 18:24

scut饮食考察之第四日：（B）：就喺依个时候，“咣铛”一声（食具跌落地声），我随即望去，立即有一大堆饭餸向我依个方向飞过嚟，原嚟有三个捞B喺到打两个人，攞起不锈钢饭盘就打，所以飞起唔少饭餸（飞到10米以外）。佢哋打到衫都被除埋（定係自己除嚟保护头部？）两个人之中一个被打到血溅当场！而捞B就闹：“是不是想打！”“操你妈！”“在scut小心点儿，别让我碰见了！”（以上国语，请注意“儿化音”）跟住捞B就走了。（我哋同埋好多附近嘅人都企开咗睇，因为真係飞出好多饭餸同埋打得好激！）

01-10-18 18:32

scut饮食考察之第四日：（C）：当啲捞B行开咗大约10米，又班马嚟打过。原先三个捞B已经牛龟咁大只，头发又係短碎，全部军佬咁，依家班马嚟果个又係咁，仲更加高大恶死，一行过嚟就：“就是你！操你妈的！”（标准强儿化音国语），就上前对流梗蚊饭果个补一脚。当啲捞B拧转身走嘅时候，先至有人出嚟：“你们干什么！统统记下名字！”（依个教工係唔係匿埋一边等打完先出嚟0架？）结果啲捞B拉都拉唔住（人多势众，加上都唔知果个教工有冇出力拉）。

01-10-18 18:39

scut饮食考察之第四日：（D）：最后散场，发现附近全部饭餸被捞B啲饭餸污染晒，我感觉今日特别好饮嘅雪碧被条菜占领咗樽口，饭盘上都有好多飞过嚟嘅饭送，仲算OK嘅汤目测好似冇问题，我都唔敢郁了。所见附近一片狼藉，全部都係散落嘅饭送，好多人嘅书包都邋遢晒，之前走避不及嘅人更加全身领嘢。我都冇乜心机再逗留了，唔怪得第五膳堂要专门划分出北方厅做隔离区啦，经过今次，我对第五膳堂快餐部好嘅果部分印象全部冇晒！

01-10-19 17:38

scut饮食考察之第五日：今日考察咗专家楼西餐厅，即西湖苑。佢哋依家搞梗12星座套餐，23～25蚊就有了。其他散点价格都中等，但係食物品种实在太少了，我试咗个黑椒牛柳乌东同吉列牛扒，品质同出边嘅西餐厅差唔多。侍应笑容足，不过人数太少。落地玻璃湖景加埋大间距餐台，环境唔错，就係啲凳唔够舒服。无论消费乜嘢，都有一篮珍珠番茄送，可惜我唔中意吃。总嘅嚟讲性价比唔错。

01-10-19 17:45

scut饮食考察之总结篇：因为scut校区大同埋我时间少嘅矛盾，剩係考察咗咁多。总嘅嚟讲，喺scut食饭都好经济，有啲真係好平，质素就有好有坏啦。至于捞B打人都只係一小撮人嘅行为，scut嘅民风都比较纯朴，开放式选菜柜前买饭都识自觉排队。至于美食广场，我就认为佢迟早会比工商局吊销执照，理由係“虚报经营项目”（入面更本冇美食！而且咁嘅环境都敢叫plaza？！）另外，scut所有普及型饭堂嘅最大缺点就係要自己收拾餐具，冇专人扫骨！

01-10-25 00:09

我去中大果时剩係食过一间好似scut美食广场咁嘅饭堂（乜名就唔知了）。总体嚟讲，价钱都係比较平，啲饭粒好似双蒸咁（有冇人唔明乜嘢叫“双蒸”啊？），啲餸菜竟然可以露天开柜，食落都係大锅饭水平。另外，台凳同scut美食广场嘅一部分一样都係果种圆台加折叠凳，都唔明点解依啲款嘅台凳仲唔淘汰（因为係差唔多一年前去嘅了，所以唔知依家中大淘汰咗未）。

01-10-25 00:18

大家可以嚟JNU睇下，基本上所有饭堂都係我比较推崇嘅四人大细台连凳，除一间外其他都冷气开放。今个学期新开嘅真正意义上嘅自选饭堂环境真正达到街边中型至大型大排档水平，成为教工、情侣、同我嘅固定就餐点（反对情侣去果度，影响晒果度嘅格调，拍拖应该去GC，饭堂环境始终太差），但係饭餸品质极差、经本人肠胃亲自测试卫生程度亦欠佳。唔怪得西门外M、KFC、PH、GC都经常性满座。

以下为续写～

××××大学西湖苑（logo经马赛克处理）

其实当时对专家楼西餐厅，即西湖苑嘅评价，好大程度係由于实习过于辛苦，一时放松所感觉到嘅舒服，所以我想重新评价下。

首先，由于作为校内专家楼，客源有限，所以西餐厅部分空间大，间隔开唔出奇。其次，价格都係好实惠嘅，确实係校内极好嘅就餐去处。

另外，果个吉列牛扒，一向出边都剩係有吉列猪扒，吉列牛扒我都係第一次吃。不过吉列嚟讲，真係做得好差，就好似做得唔好嘅咕噜肉咁，外层完全同肉脱离，而且外层脆皮做得仲差过大西豪做嘅快餐入面果块，谂起都冇食欲。

不过总体嚟讲，以校内有间咁嘅餐厅，的确算唔错，而且餐台旁边嘅落地玻璃外嘅景观极之开阳，由于係山坡上面，所以居高临下，将整个湖景尽收眼底，确实係紧张学习之余嘅一大放松好去处。

以上仅为作者个人主观意见，与本站立场无关。

• 0 Comments