我其实已经返咗GZ好几个星期了，不过我份人实在比较懒，冇乜动力冇乜目标，乜都係心血来潮一阵，虽然唔係好忙，但係喺JKT最后嘅两日嘅日记一路都冇写到，不过当时我真係好感慨，到依家回想都好感慨，所以都係想写低。

日子一路路逼近，最后到我留喺JKT嘅最后一日了，如常返公司，喺IT Room一如既往冇乜嘢做，将我之前所有做嘅工作，数据库转发咗俾部门经理同秘书室，连同我做嘅文档，需要嘅software挂咗上内部网，另外再发咗一封信俾整个cn-team，IT Room，secretary室，仲有老细，say farewell。好快收到好几封回信，祝我旅途平安。我同时喺信入面特别感谢咗IT Room嘅Tedy同埋秘书室嘅Eva，不过Eva已经调咗去做其他部门嘅秘书了（秘书室係老细专属）。中午一如既往去公司canteen食中午饭，不过冇同canteen入面嘅任何人提我听日就走了。

时间慢慢逼近，IT部经理Paul同我握手道别了，香港嘅经理AT Chuan过嚟嘅时候都同我握手道别，Martin过嚟将一啲钱交俾我带返去俾老总。

今日都係穆斯林斋戒月嘅第20日，公司晚黑会举行晚会庆祝，佢哋之前就已经讲咗几次叫我join，不过就呃我话係开俾我嘅farewell party，不过我当然拒绝并且唔相信啦。当日下昼佢哋早早就去换晒回教徒嘅传统服装，去公司楼下工厂旁边嘅空地举行晚会。我惊Tedy走咗，因为我开玩笑唔肯同佢握手道别，而且我冇遵守诺言将剩低嘅voucher俾佢，所以周围揾佢哋开party嘅地方，但见佢哋竟然。。。开会咁，除晒鞋坐晒喺空地嘅绿地毯上面，听主持人讲嘢，跟住IT Room嘅几个人，包括Tedy喺到影相摄像之类。我放心咁样返番上IT Room，其他少数几个非回教徒已经领咗party嘅饭盒开始食了，我就继续删除我用嘅电脑入面嘅资料。趁IT Room入面人少嘅时候，将事先提早准备咗成个星期，准备俾Tedy嘅礼物写我字样，帖好封好，偷偷放到Tedy台面。

最后时间差唔多了，Helen，Lisa同我准备坐车返宿舍了，我仲未同老细讲声，好彩，发觉老细就咁啱喺二楼，同人倾梗谒，我就行埋去插口讲话我听日就走了，结果老细好似完全唔知咁样话，哦，听日咁快啊，招呼唔到啊，我话唔会啊，学到好多嘢就真，老细话，唔惊，反正仲有人过嚟，我都唔想留你太耐，你走啦（太hurt我啦，心都碎晒啦）。讲完好似交晒差咁样，好开心，见到Office Manager，好cool嘅冷艳Audrey喺某间办公室，即刻入去同佢握手，嘻嘻，握咗秘书室三大女秘第一位，跟住冲去揾活泼女秘Eva，同佢握手，虽然之前有抱怨Eva冇帮我手，不过我亦内疚自己太过过分，太多私事都麻烦Eva，觉得好唔好意思，况且最后Eva调咗部门，好多嘢其实佢可以唔理。Eva同我表示唔好意思，好多嘢帮唔到我，我就即刻话冇咁回事，我知道佢真係好忙好忙，真係好感谢佢，而且，有小小私人谂法，觉得有小小内疚，始终觉得喺Eva面前有啲对唔住佢。Eva只手真係好纤细，好，握完第二位女秘了，剩低最后嘅一位优雅Irene，唔知去咗边到，但係我要落楼等公司车了，结果喺停车场见到Irene，我即刻追上去同佢握手，真係好开心。

跟住我即刻抓紧时间，行去party嘅地方，同Tedy握手，啱啱过六点无耐，回教徒开始食嘢了，Tedy啱啱打开个饭盒，我行过去同佢握手，另外，同IT Room嘅其他几个人，包括Ewin，Alvi，Iman握手，依个时候，负责俱乐部项目嘅Floria见到我，叫我过去握手，不过我推说要除鞋先可以上地毯过去，就冇过去，Floria就主动过嚟同我握手了。跟住我就行返去门卫果到同Helen，Lisa一齐等公司车了，内心好激动，好满足，因为同所所有有帮助过我嘅同事都握过手道别了，真係好开心。

返到宿舍，Helen攞出三盒盒饭嘅其中一盒俾保公，佢话唔食了，就返番上房，剩返握同Lisa喺一楼嘅厅到食盒饭，我影低咗盒饭嘅几张相就开始食了，Lisa又同我share从GZ带嚟嘅橄榄菜——我觉得好麻麻。期间美女Juli返咗嚟，我把握最后一次机会望多咗佢几眼。无耐，Devina佢哋都由Martin揸部靓车送咗返嚟。因为第二日要6点几登机，所以我快快脆脆食完就准备冲凉了，喺我准备入冲凉房嘅时候，人事嘅Suri叫住我，话Tedy问我手机号码，我话我等阵发俾佢，Suri叫我一定要记得，可能係因为Tedy严重咁样托付咗Suri，Suri话要将Tedy手机好码写俾我，我就话我即刻返房攞纸同笔，Suri话唔使了，即刻喺手袋到攞出公司嘅会议记录簿写低号码撕出一角俾我，我多谢咗佢就将纸片放入我冲凉放衫嘅胶袋入面就匆匆冲凉了。我知道Tedy一定係为咗我留俾佢嘅礼物而想联系我嘅，但係我唔多想复，因为我唔善于讲啲乜嘢客套说话，有啲尴尬唔想面对依啲时刻，依个就係点解我要偷偷留低礼物而唔係当面交俾佢嘅原因。

冲完凉我就返房收拾行李了，将重嘅嘢放晒入行李箱，一再掂量，由手信上面嘅标注冲量估算行李重量，将御寒嘅衣物放入背囊，邋遢衫（因为凌晨4点就出门了，洗咗嘅话绝对唔够时间干）用胶袋封好放入背囊，因为行李箱实在放唔落了。睇住条邋遢嘅underware唔洗反而收买，小小洁癖嘅我实在忍受唔到，将佢卷到好实，塞了污糟衫嘅衫袋，再将污糟晒卷实，再用胶袋袋住，压走晒入面嘅空气，先安心小小。去厨房将我啱嚟JKT果时买嘅用到依家嘅饭碗攞走，饭碗唔可以唔要啊，不过连埋一套嘅匙羹就一早唔见咗了。将DC，notebook，dollar，passport，ticket摆晒入手提袋到。整理好之后，将我食剩嘅小小食物同埋日用品攞去俾Lisa，连同voucher，我同Lisa讲，voucher就由佢出理了，佢可以自己同Helen嚟share，亦可以第二日攞去俾Tedy，我话我唔想令大家唔开心，当然，其实我剩低嘅voucher数额好少，应该冇所谓，Lisa明我心意，话第二日会攞去俾Tedy，我一再感谢Lisa。Helen亦喺依个时候出咗去了。我喺房间，想打Tedy手机同佢联系，可惜攞唔到外线，去门口嘅总机试都係攞唔到外线，应该係故障，咁就得啦，唔係我冇努力尝试过，而係天意，当然，我冇用自己嘅手机去打俾佢，主要係因为我手机要充电同埋关机留电，以防听日之需。而且虽然係漫游，但係我实在唔知係收市话话费定係国际长途话费。依个时候Suri打电话嚟我房，问我联系咗Tedy未，我话电话打唔到，联系唔到，Suri话Tedy嚟电追问，我就同Suri讲我手机係中国SIM卡，打唔到（我唔知啊，求其推说），我叫Suri将我分机号话俾Tedy听，叫Tedy打嚟啦。过咗一阵，Suri敲我房门，将佢嘅手机递俾我听，话係Tedy打嚟，我就用佢嘅手机，同Tedy通话了，Tedy不外乎感谢我嘅礼物，同埋向我道歉，话下昼关于话我voucher一事唔守承诺只係讲笑，唔係认真，希望我唔好摆喺心上，我当然唔会啦，Tedy当时就讲话佢唔係认真嘅，佢只会对工作认真，其他嘅事唔会人认真，我当时亦冇嬲佢，只係自己为难，觉得唔知点样做好。Tedy再祝我旅途顺利之类，我都冇乜好讲，另一方面，Suri喺隔离，我唔好意思咁样用佢部手机咁耐，就草草结尾，不过真係好伤感，我真係最唔舍得嘅就係朋友，跟住我不断感谢Suri同埋表示麻烦到佢唔好意思。

好了，时间都唔早了，大概9点几十点挂，我就上床瞓觉了。

手机未闹，我差唔多三点就扎醒了，挣扎爬起身，我真係唔愿起身，因为实在想继续瞓。起身，洗刷，便便，换衫，冲咗杯雀巢麦片做“早餐”，换上长袖衫，最后嘅packing，检查房间冇漏嘢，过咗三点半，Lisa同Helen都起身了（佢哋送我），接近四点佢哋都出嚟了，等公司派嚟嘅车。原定4点嚟车，结果4点过几个字先到，我哋就匆匆上车，司机係我指定嘅识少少英文嘅后生司机（真係唔好意思了，咁大牌）。

实在喺太早了，一路上都冇乜车，好顺车，开得好快，我攞出我最后一包康元提子饼俾Helen同Lisa食，而佢哋就好眼瞓，话寻晚根本都瞓唔着，而我反而就好好瞓，唔想起身添，佢哋就喺车到小息了，而我就最后一次浏览依条我坐车行咗无数次嘅进入市中心嘅要道嘅两旁景物，包括辉煌嘅写字楼，雅致嘅大学，遍布嘅银行，大型嘅购物中心，闪亮嘅不锈钢回教尖顶，仲有，凌晨中微弱灯火依然透亮嘅Taman Anggrek购物中心，我最开心最留恋嘅地方，两次同Alex去，最后一次同Helen同Lisa去，唉，依家遥遥相望，静静咁样喺果到，完全冇晒白昼果种热闹。

车飞得好快，喺高速公路（Tol）上面飞飞下咁，结果我超重嘅行李箱竟然将后面嘅座位压烂咗。用咗45分钟就到咗机场了，其实感觉就係夜晚，好少人，疏疏落落，孤单上路嘅感觉真係唔好，我同Helen，Lisa握手之后就独自过安检，正对就係China Airlines嘅柜台，经济舱。行到埋柜台，回头睇，已经唔见咗Helen同Lisa了，回想当日，我同Helen同Ruth去送Alex机，都係Alex过咗安检，我哋转身就走了，唉。我排嘅果条对特别慢，隔离好几个柜台都搞掂了，甚至比我迟嚟嘅都搞掂了，原嚟前面果家人一共六个人，结果搞咗好耐，搞到我急晒。佢哋一搞掂，行李喺运输带上面啱啱移走，我就急不及待咁将我嘅行李箱放上去，最主要太重了，好紧张超重，超重1kilo要罚成70蚊，我要考虑唔要边啲嘢同埋接受最多几多嘅罚款。个人行李限重20kilo，hand carry限7kilo，我将行李箱艰难咁样连托带拉搬上传送带，因为实在太重唔够力，磅嘅电子表显示不断咁跳，不断咁样跳上廿几kilo，因为仲未放稳，所以一直跳，跳，跳，跳咗好耐，其实只係一阵间，但係令我觉得真係好耐好耐，最后，个表终于停低咗，红色嘅LED停咗喺19.7kg上面，好嘢，我所有嘅手信都可以带返去了，好开心咁样继续check in，拣咗个window seat，一切好顺利，俾咗RP100,000机场税，攞咗登机卡，就过去过关了。喺海关果到，喺啱啱过咗去一个女嘅，之后成排海关柜台，得我一个人，我个柜台喺两个男嘅官员，一边检查我passport同相关证明文件，一边挤眉弄眼同我讲“money…money…”，我唔鬼睬佢哋，剩喺细细声“吓？吓？吓？”诈傻扮懵，跟住佢哋见唔见效，就同我讲普通话了“小费…小费…”，我一于好少理，慢慢等佢哋处理我嘅证件，佢哋边讲依边唔停手咁样处理，最后都係搞掂攞返俾我，我依个时候就用印尼话向佢哋讲声多谢，激下佢哋都好，哈哈哈哈。

依个时候先5点几，离登机仲有成个钟，我就喺登机通道出边坐咗下，发咗条短信俾屋企人，去咗下洗手间，跟住就过安检去候机室了。过安检果时候，我将hand carry嘅行李放上传动带，我只係放到去头头一段，后尾发觉原嚟头头果段滚轴係唔识郁嘅，结果啲行李停晒喺到唔郁，真係笑死人了。而我前面有人俾开包检查，检到啲燕窝。而我个notebook就俾停住传送带透视咗好耐，冇办法啦，全球最新最细最轻讯驰notebook，喺比较容易受怀疑架啦（^_^讲笑讲笑）。

换咗登机卡入咗候机室，四周都係落地玻璃，外面就係停机坪了，天开始慢慢朦朦光起身。候机室入面有部电视，不断播新闻，滚动文字新闻，仲有不断插播旅游广告。其中有一个係巴厘岛嘅广告，配住巴厘岛特有嘅音乐，果种敲敲打打嘅韵律。我之前喺Taman Mini同其他地方听过依种音乐，但係当时并冇乜嘢感觉，依家就突然觉得好好听，令人有一种懵懵懂懂嘅感觉，就好似喺夏天，茂密嘅树荫底下，风吹过，成个人都恍恍惚惚咁样，真係好迷恋依种感觉。

等到太阳出嚟，终于开始登机了，从头等舱开始登，再到我等经济舱。细飞机，两边各三排座位，而我係窗口位，我旁边冇人坐，之后先到通道位一个阿伯坐，好开心，我部notebook可以唔使放地下放上旁边嘅座位了。上机前我攞咗份最厚嘅星岛日报，取其精华剩喺睇咗佢嘅娱乐版，两个月了，我好惊自己同社会脱晒节。

好快，飞机就准时起飞了，一扯就直起，唔似香港机场咁样一扯仲要转个弯咁唔爽。我嚼住黄箭，望住地下逐渐变细嘅汽车，嚟嘅时候嘅公路，大片嘅农田，湖水河流，跟住岛海边，大海，白云，一切好似一场梦咁样，我真係好唔舍得依两个月识到嘅同事同朋友，见到嘅人，仲有冇好好咁样同佢哋交流，我真係好唔舍得佢哋，寻日仲好似日复一日咁样每日上班照面，倾谒，熟悉嘅座位，电脑，仲有canteen，熟悉嘅canteen店员，铺家，今日就全部都见唔到了，甚至可能以后都冇机会可以再见了，我真係突然觉得好伤心，伤心到落泪，讲真，我真係一啲都冇挂住屋企，我剩喺挂住依啲朋友。睇下表，未够7点，佢哋应该都未上班，而自己已经出发咁耐了，觉得自己已经彻底咁样脱离咗佢哋了。

原先谂住自己会喺飞机上面补瞓返觉，但係根本就瞓唔着，只係觉得伤心，为同朋友分别伤心。听咗下广播，冇乜好听，冇乜心情听，古典部分全部都係交响乐，冇乜百老汇或者歌剧。我就从一大叠嘅星岛日报中间抽出娱乐版离睇，我觉得自己一定同自己原先生活嘅环境脱节咗好多乐，所以努力咁样去睇娱乐版，其实我喺JKT基本日日返工都有上网睇新闻。好快睇完，其他时候就係睇出边嘅景致，睇茫茫俾气体迷雾包围嘅球体。食飞机餐，好早，大概十点就食了，终于食到China Airlines嘅咖哩鸡饭，饭后除咗水果之外竟然有一旧好大旧嘅鸡蛋布丁，真係好大好大，平时喺GZ鬼咁贵都係得好细杯，今次第一次食咁大旧，虽然比较中意食，结果都係食到我好漏。我一路都喺到等睇电影，回程播嘅係“加勒比海盗”，比去嘅时候果出迪士尼嘅闷儿童片好睇好多，可惜我角度唔係好好，近嘅角度唔啱，颜色会变，而且头要担好高，远嘅我视力又有限。不过我都睇得好开心，因为剧情几幽默。最可惜就係冇广告时间，搞到我去洗手间错过咗小小。电影令到我心情好返小小。之后无耐临到HK之前又派三文治，我都算食得够了。

旅途都算顺利，比较准时到HK，遇到嘅气流唔係太多，就係临到之前有一个抛得比较犀利小小。最憎HK国际机场起飞降落都要转个弯，感觉好唔爽。

落机之后我行得好快，根本冇行传动带，直冲出关，不过揸护照果到就打蛇饼了，前面好多内地到港旅游嘅人。我趁排队发咗条短信俾屋企人。出咗关我就发觉我拣错出口，我排嘅係第八，而行李就喺第三，搞到我行好远，好快认咗行李就出禁区了，一出就见到嚟接我嘅亲戚。佢带我坐巴士到上水，转轻铁到罗湖，再过深圳，出关果时HK果边电脑又坏，滞留咗好一段时间，好多人好逼，真係等得辛苦过得辛苦，跟住入境，我一下子又揾唔到填入境纸，搞咗好一阵，过咗之后就去隔离搭火车返GZ东站。最辛苦就係上落火车站之前嘅果个天桥，因为我行李实在太重太重了，扯到我差啲俾扯返落去，喘晒气上到天桥，得出结论：中国人就係肾虚！

上咗火车，虽然係空调软座，但係始终改唔到火车果种污糟同臭味，而且仲係好多人係企位。好彩我坐嘅係四人相对位，有一张台，我比较早入座，所以一嘢将行李箱放上台，占咗半张台位置，不过我真係有啲惊太重会压烂张得一直脚嘅台。开车无耐，我突然想试下开行李箱嘅密码锁，因为当时我离开JKT宿舍嘅时候唔记得锁密码，临托运先谂起，即刻求其拨乱嘅。依个时候我发觉打唔开了，一个个数字试都打唔开，死了，有冇攞错行李啊？我攞行李果时谨慎对过了，我即刻攞锁匙开另外一格，开到，咁应该冇错了，先冇咁惊。不过试咗好耐密码都係开唔到，就算数了。坐完飞机，再坐火车，发觉乘务员真係差好多，推住手推车大声叫卖果啲垃圾食品，简直就係垃圾。

一粒钟之后我就返到污糟邋遢嘅GZ东站了，老窦买咗站台票嚟接我，唉，仲谂住佢仲有当年嘅证，可以直出直入添，退咗就乜都唔同晒。出到去就见到阿妈了，成班人好论尽咁样先上咗的士，如果俾我自己一个人嘅话一定唔会咁屎。

返到屋企，觉得除咗城市阴暗之外，屋企楼下嘅路都比较暗，楼梯都又暗又细又矮，屋企都係有啲暗，靠光管照光，有小小陌生感觉。不过好开心，终于都冲到热水凉了，洗返好滑嘅洗发水（我带去JKT嘅带错，唔滑），饮返正宗嘅老火汤。行李箱老窦帮手撬开咗，入面我好细心用胶袋衫裤一层层包住再垫住嘅唱片一张无损，剩喺压烂咗一盒手信嘅盒，都算几好啦，哈哈。

• 0 Comments

今次应该係我最后一次去Taman Anggrek了，下昼点几落班就去，我行唱片店行咗成两个几钟，行到脚都痛，买咗好多唱片，但係都有一啲犹豫之下冇买，主要係惊过度挥霍金钱，另一方面係惊行李入面过多光盘会出问题。

• 0 Comments

又係成日喺宿舍，瞓觉，食饭，闷死。

• 0 Comments

光棍节，哈哈，事后先知。

• 0 Comments

今日终于喺公司换咗美金，成8.5，贵到死。

• 0 Comments

今日下昼IT Room又要去搞我宿舍房间入面嘅电话系统电脑。Iman同我坐车返Mes，攞咗部古董针式打印机去打咗10页记录出嚟。回程嘅时候去咗附近嘅一间我哋公司嘅分厂（satellite factory），后嚟得知果到原嚟係孤儿院，老板将地方买落嚟做工厂，俾孤儿工作，算係慈善事业。果到环境唔错，几大，花花草草，成个住宅小区咁样。

• 0 Comments

临返嚟嘅前嘅信。

风筒坏咗成个月了，我就日日朝早戴一阵帽，将头发压服，不过就分唔到界了，所以就去买咗头腊嚟set头。

其实最后嘅依三个星期保姆都唔喺到。保姆三个星期前病咗返咗屋企修养，单程坐车都要12个钟。保姆走咗，冇人搞卫生冇人煲水冇人煮饭冇人洗衫。我房间都算一般干净，一般我每个星期先扫一次地（地板係铺瓷砖嘅），拖就剩係拖过一次。每日喺公司临走我都会用矿泉水樽装一樽水返宿舍晚黑同第二日朝早饮。晚饭就同同事一齐煮。至于衫就冲完凉之后自己洗，都有公用嘅洗衣机，不过麻烦，除咗星期日洗牛仔裤用之外，平时都冇用，剩係用手洗。睡衣就朝早一早起身刷牙洗面之前洗。最惨就係保姆啱啱走嘅果几日我感冒，天气又比较凉，仲要冲完冻水凉之后自己洗衫。不过洗咗一个星期之后就习惯晒了，觉得洗衫係生活嘅情趣，可以慢慢享受。洗完之后我多数会用洗衣机甩干，快干好多。我觉得出边太污糟，蛇虫鼠蚁又多，所以我都係挂返入自己房间阴干。

喺依到我一般都唔敢食辣椒，因为一食就喉咙痛。依边餐具卫生状况太差了，我嘅肝炎疫苗都打咗好多年了，不过依几年体检我都唔使再打针加强，唔知依家点，希望返嚟可以有机会去验下肝炎。

因为保姆走咗，而宿舍晚黑又有人潜入嚟偷公司摆喺到嘅货，保姆走之前晚黑攞住把水果刀喺楼上守住，所以公司派咗两个保安喺依到守住。冇咗保姆，晚黑都冇人放狗了，狗就唯有将便便屙喺狗舍旁边，臭到死。有一排都冇乜人去喂狗俾水狗饮，搞到两只狗好惨。

依到成日听人讲治安好差，譬如人肉炸弹准备再出动炸万隆，坐车嘅时候门都係锁住嘅，以防有人突然开车门抢嘢，仲有塞车嘅时候有人用斧头敲车窗要抢钱，不过依啲嘢我暂时都未遇过。依到嘅人态度都好友好，比如公司嘅司机都好尊重我哋，好分等级。公司大部分嘅同事都好友好，我仲去过一下一个同事父母嘅屋企，佢哋係当地爪哇人，屋企人都好友好，好想认识下我依个中国人。大小购物中心入面嘅售货员都好好态度，好亲切友好，好好笑容，一啲都唔似香港，喺香港果时去时代广场，啲售货员都冷冰冰高傲到死，一派井底之蛙。

公司好多当地同事英语都麻麻，甚至差过我，不过交流仲勉强可以。秘书英文就唔错，所以我比较中意同秘书倾，同埋同倾得嚟嘅同事倾，乱讲英文都问题唔大。依到嘅华人有钱嘅话受过比较好嘅教育，英文就都唔错，有啲仲去过中国学中文，可以讲几句，有啲有实力嘅出国读过书嘅英文都唔错。

中国嘅教育太着重唯物主义了，所以我嚟到依到见到咁多回教徒，咁多基督徒感到好奇怪，觉得点解科学咁昌明仲会有人咁痴迷宗教，觉得好唔理解。

• 0 Comments

今日喺公司无所事事，行行企企倾下谒，人哋就个个都好忙，搞到我都唔好意思，主要我今日又胃痛，好唔舒服。中午食完晏就写咗一封信俾老细讲咗下自己嘅工作同埋讲咗下个星期签证到期了，不过下昼老细一直一个会接住一个会咁开，下昼落班先回信，同广州老总话15号送走我。我算开心啦，即刻喺Yahoo Messenger话咗俾屋企人知，依个时候Tedy走咗出IT Room了，我追咗出去同佢讲再见，不过冇同佢讲我走了。佢好惊讶，以为我有乜嘢事同佢讲，依家谂返，觉得自己真係好细路仔啊。Tedy先26岁，已经结婚4个月了，老婆都已经大肚几个月了，但係睇落真係大我好多，我觉得自己真係永远都长唔大。

• 0 Comments

今日helen去咗bantung，得返我同新嚟依边嘅GZ同事lisa一齐去买米，煮晚饭。

• 0 Comments

今日终于喺依边借到我九月份嘅人工，有RP2,800,000.00，第一次有满足嘅感觉。

• 0 Comments