今日搞论文好辛苦，2楼到5楼上上落落几次，因为SARS，so电梯冇开，我中午剩係行去饭堂买咗个hamburger，加百事清柠，个人攰到完全饮唔出柠味，结果咁样嘅体力，搬咗部电脑同显示器上去，我哋组一共搬咗三部主机，两部显示器，认真攰死，明明论文做软件，结果要搬硬件（就係有人唔了解我，误会我依句话嘅感情色彩，话我本科就懒清高，话我意思係认定我睇唔起某类工作，我好冇瘾，即刻驳到佢唔出声，知唔知硬件技术含量多几多？）。

我一路好赶，好赶，跑上跑落，个人就快散咁滞，但係都坚持跑步上落楼梯，我真係会晕低，搬果啲电脑又搞到件衫污糟晒，我又以最快速度插线，调试，跪喺地下写html，想尽快搞掂，因为我约咗领导，但係最后只能够赶到4点搞掂，我都觉得自己太迟了，但係，因为我知道依家虽然好忙，但係之后就冇乜机会可以咁样揾领导玩了，4点，我犹豫一下都係兴冲冲咁样phone领导，因为好多时领导都係咁迟架啦，点知领导拒绝咗，我算数啦，不过我真係好冇用啊，衡量一下，觉得如果今日唔见下领导，可能以后机会就会少了，就打第二次电话俾领导，不过，领导以为我要屈佢请我去KFC，断然拒绝，或者係因为我前几日问佢借钱，所以避我啦，估唔到，我讲笑要借钱或者讲笑要人请食饭嘅威力係咁大，真係即刻避晒我，唉。或者我太小朋友啦，唔应该成日揾人玩，但係谂住以后冇乜机会一齐玩，谂住见下领导，感激佢依排帮我吹，但係领导又唔明我苦处，觉得我係无聊得滞捉佢出嚟玩挂，ok，唔想见就算。

听日下昼就答辩了，听晚我有心情嘅话，就整理返pip出嚟，关于黑幕，我觉得我依家已经变得可有可无了，连师兄都忽略我存在，但係好假咁样喺我面前做样，我觉得真係好呕心啊，你唔理我，我ok，冇所谓，但係你唔好咁假啊，我涉世未深，唔识点样好假咁样回应你啊，假到咁出面，反而会令到我好尴尬啊！

• 0 Comments

想做新版，做下做下，觉得依家果个唔好睇，做梗果个一般，so，换返旧版，不过好多部分都做咗好细微嘅修改，算係fix版。

其实，换版最主要嘅原因，就係私人原因，而且心情实在，喇住喇住咁，仲成日心悸，唔知係唔係贫血，又日日俾人闹，生活得担惊受怕，成日都要绷紧晒作好心情搞笑状，以免俾人闹多几句。

点解我又开始做新版？今年7月21号就係我网站诞生5周年纪念了^_^，我唔知有乜嘢可以开心，可以去迎接。

星期五，发觉领导知道得太多了，係少数唔係成日接触我但係就知道晒我好多情况嘅人之一，最弊就係乱唱俾其他人知，人哋问返我，我真係吓一跳，点解陌生人都知道我咁多嘢？So，真係唔×人×口都唔得，只有×人先唔会出声，哼哼哼。

我谂，係我心情好返之前同埋有新灵感之前，新版出现嘅机会好微。

因为旧版嘅一啲制作工具软件有问题启动唔到，所以首页嘅flash有一个显示bug，唔讲了，另外，旧版冇包含pip栏目，我都懒得加落菜单，等迟啲我整理下归入attitude啦，答辩之前做一篇结局，毕业之后做一篇真相，揭露我论文入面两个恶心嘅谎言，一个我嘅无奈同遗憾，再揭露一个另我恶心嘅针对我嘅人，当然，依个人我都只係会喺依到讲下，唔会写出去，不过，依个人简直就係摆明有心刁难我，我一唔小心就会俾玩残，分分钟论文都衰埋，真係唔明佢究竟有乜动机。

• 0 Comments

依家论文基本都係debug了，寻晚好开心，做到我想做嘅功能，我第一次开始对自己做嘅满意。

今日返到学校，班长竟然话影毕业相着袍入面应该着长袖恤衫，否则露出玉臂唔好睇，靠，我仲专登买咗短袖恤衫添。

从学校返屋企果时，顺便去睇界口碟，结果发现『劇団四季』85年4月21号首版嘅CATS，品相好好，连外包装胶纸都非常完整，我内心估价，40～50，如果50就偏贵，要讲价，如果50以上就係乱咁开大价了，40为最可能接受价位，不过我比较志在必得，因为依个版本比我先前买嘅果个89年2月8号出版嘅二次录音要好，我攞住张碟，再睇下其他，因为今日有小小钱，谂住买果张日版Ronan Keating俾领导，点知已经卖咗。好，问价，又係上次果个Ronan Keating开大价50嘅有一只假眼嘅男嘅，佢攞嚟睇下，跟住开价——30，我听唔清，再问一次，答：30！我嘅下一句就係：唔该俾个袋啊……只手就已经去攞银包了。觉得真係好运，撞到个唔识货嘅人，开咁低价，上次我买89年二次录音，品相差好多，又冇咗胶纸套，都要40唔讲价。

今日又入去中间果间店，上次我去，我攞起张碟，睇下，果个男嘅，捞B，同我讲：这张碟不错吧，我问几钱，答，50，我觉得都差唔多了，因为日版，而且品相好好，不过我冇心买 放低，佢即刻话，你要的话便宜一点，我冇理，走果时佢再同我讲，那张碟你要可以便宜，我问几多，佢话：你开个价，我好幼稚咁讲错一句：我开的话开很低的，佢即刻驳我，5块？5块？仲要冷笑，认真激气，我回答佢，你这张碟这么好，一定可以卖出去的。今日去，当然真係卖咗啦，见到佢喺到氹个男嘅买黑胶垃圾，喺到话：这些现在有，下星期可能就没有的了，现在已经不出了……这些不是随便印的……原装外国运来的……唉！你一点都没有听我说……这个你能买到是一个缘分……听到“缘分”依到我差啲呕出嚟，即刻走人。仲有上次我去另外一间店，有张孖碟开价40，我还20，其实应该25比较适合，主要係我冇钱啦，结果个女嘅又係冷笑，转身同另外一个男嘅讲：20……，认真激气。果次仲有买多一张东芝出嘅『猜火车』DVD，谂住买多张保存，主要係果间点唔识货，个女嘅开价50，我梗係唔肯，因为我第一次买，只係30，加埋OST一齐，50，而且係因为我讲错嘢所以冇讲价嘅开大价，所以今次唔买，个女嘅猛讲，你知唔知DVD嚟架，係咁价钱啦，后尾我行出店果时，咁啱男店主返嚟，原嚟个女嘅真係乱开大价，问男店主几多，男店主同我讲，降咗啲俾我，我唔肯，话我只係想买多一只保存，而且上次隔离买加埋原声先50，店主话：三级架啵，我即刻还击：三乜嘢级啊（其实我口快乱驳，确实係限制级，不过好彩包装上面冇明显标明），结果男店主话35，我都係唔肯，最后佢话，俾你了，^_^。佢再问我，依部叫乜嘢啊？我答佢：猜火车。我谂，以后当佢知道依部片喺某些圈子入面嘅地位，就会觉得卖便咗了。之前，我都喺依间店买咗张Dirty Dancing嘅DVD，1987年嘅算係名片啦，因为奥斯卡攞最佳音乐，描述60年代辣身舞喺美国非主流文化中嘅作用，收藏版，不过个盒界口，碟就完整，我都係讲错，结果20，觉得买贵咗，因为其实正品不过11刀几。

• 0 Comments

今日终于交咗论文初稿，but，只係赶出嚟应付下嗟。

唔想再写了，唔想写，真係唔想写了……

• 0 Comments

写论文真係写得好辛苦，预算咗一下，依几日要好辛苦先可以完成。好攰好攰，坐落沙发，舒缓咗下酸痛嘅瘦肉，觉得只係舒服咗一半，because，仲有好多嘢烦，but仲要俾人指责，突然觉得好想俾某人打一身，觉得咁样会舒服好多，起码等人哋发泄下，唔好成日对我咁多怨气。so，觉得自己真係好贱啊，竟然想人哋打^_^

• 0 Comments

寻日返学校进行所谓嘅义务劳动，究竟有几多人係真心愿意嘅，我唔知，大家都唔敢表达出自己觉悟低。but，“接待”我哋嘅老师都好好，物理楼嘅，开窗、开空调俾我哋搞卫生，仲开埋音乐俾我哋。我真係好多年，应该四年有多冇搞过卫生了，抹台抹电脑抹窗拖地，搞到我手鞋晒。喺SARS横行，学校半封闭状态（进校需检查证件），成为广州几个大学疫区之一嘅时候，返去形式主义，此乃顶风作案之一。

今日，为咗准备影毕业相，揾阿妈去行街，买咗我咁大个仔嘅第一件衬衫同西裤，以前学校强制购买硬性规定升旗着嘅果种形式主义唔算数。周围好冷清，虽然五一假期，但係同样因为SARS，冇乜人行街，好多专卖入面都空无一人，见到我哋，仲要係有购物意欲嘅果种，啲店员都捉住唔放。我真係唔得，我可以接受清静嘅小市镇生活，但係绝对唔可以接受冇街行。冇防护措施周围行街，此乃顶风作案之二。

心情都係好差，个个都咁唔负责任，害完我就唔理我，仲要话係我自己嘅责任。定係我自己太过赖人呢？

• 0 Comments

我部电脑真係唔得了，好慢好慢，系统慢，软件慢，成日响应慢，虽然唔会死机，但係就冇晒响应，一个小小操作，甚至一个鼠标右键菜单都等成分钟先出嚟，唔好讲运行软件了……but，我冇心情去重装。鼠标都坏晒，左键失灵晒，成日断续，搞到我写程序嘅时候处理文本好唔方便，效率大减，so，拆开咗佢，喷咗啲菲利普触点清洁剂就冇事了。其实，依啲咁嘅mouse，虽然依家已经係低端了，但係，讲真，俾我自己真係唔会去用依啲咁贵嘅嘢，三位数一个mouse，太奢侈了。我同领导讲过有问题，领导叫我去换一个，指包换果只，今日谂起，我都係冇谂住去换，始终个mouse都係领导俾我嘅，我都係有啲念旧，唔想抛弃佢。

今晚又俾人话我揾唔到工好得戚，认真激气。

寻晚猪猪同我讲咗论文6号之前要交，我真係未动笔，好彷徨，而且其他人进度呢？如果进度唔得，就要今年12月先可以答辩，suck！好心佢哋唔好顾住自己返工就唔顾论文，体谅下我依个失业青年毕唔到业先得架。寻晚冇做乜嘢，但係好攰，结果冇熄电脑，冇刷牙洗面就瞓上床，大概只係11点12点左右，谂住瞌一阵，点知一瞓就瞓到今日朝早6点几7点起身，老窦老母见我咁早起身好惊奇，问我係唔係要返学。

觉得真係好颓废，成日喺屋企对电脑，食零食，关埋房门开大空调开大音乐上网写论文。觉得依排真係太孤身作战了，冇f可以俾小小支持。依家听梗Kiss Of The Spider Woman，真係好伤心，唔知有冇人同我对蜘蛛女之吻嘅理解一样，就会理解我点解伤心，伦敦卡司，比我听开嘅百老汇卡司含蓄啲，蜘蛛女把声比较苍老一啲。

• 0 Comments

考完长途了，不过，依家心情并唔觉得开心，都係一贯嘅低落，过两日等我论文开始埋尾，我就写下今次长途嘅经历啦……

今日朝早5点就起身，未够六点就打的返学校，最早见到係肥晖，肥晖真係好唔好老皮，可能喺熊莹面前宣泄咗啲不满，熊莹过嚟话佢：咁样喺师弟面前影响好唔好，跟住讲咗啲乜嘢你唔想嚟可以唔嚟，乜嘢依个係一次教育之类。而我就好急尿，但係咁早，周围都未开门，冇得去尿尿，真係好痛苦。

今日睇完Charade（谜中谜），睇到邮票市场同埋地铁果两幕，我发觉我其实以前睇过，应该係挂，因为印象比较深，当然，有一种精神病係会令人觉得当前事件以前发生过，我好多时都会咁，but，我谂今次唔係挂。虽然好多时好憎领导，不过，有时觉得领导某些时候都唔会太衰，虽然始终觉得佢好假，but今次都係全靠佢先下载到Charade。

有好多无奈嘅嘢，but唔想谂了，but都揾唔到开心嘅嘢去谂。

• 0 Comments

呜呜呜……连自己都好多日冇上过自己个网站，日日去学车，真係好辛苦啊，我好想喊啊～～

讲下学车啦，揸路面，我开咗一阵，教练就叫我停车，换人，话：一身汗了，换人啦——我谂，我都唔会好多汗啊，点解教练咁体谅我？原嚟，教练係话，佢见住我揸，坐喺我旁边都一身汗！所以换人！

另外，某日练山路，我竟然听唔到手机闹钟，唔知醒，好彩我惯咗手机日程表记录事务，咁啱我做咗提醒，结果喺闹钟之后一小时响，我一听到即刻扎醒。So，搞到我依家除咗搞闹钟，仲要再每相隔10分钟做一个提醒，一共做三个闹钟先得。

寻日考咗泊位了，因为好晒好热，都几辛苦啦，返嚟又屙肚，屙咗成六次……

讲返依排，史卡拉歌剧院蝴蝶夫人实况DVD真係好正，so我开始写梗我所拥有嘅三个蝴蝶夫人映像记录比较评价，不过实在太忙，so未写完，暂时唔可以放上嚟。

同学用同DHL合作嘅速递公司将我喺amazon买嘅嘢寄咗俾我，真係好平，先13刀，原先速递公司打电话话我知星期三到上海，星期三、四先到广州，结果星期二下昼就到咗我屋企了，真係好快。到依家为止，我终于完咗我梦想，收集齐咗贝隆夫人（Evita）所有嘅官方英语语种版本，可惜就係未能喺旧年7月收集齐，完唔到我准备喺贝隆夫人逝世50周年当日听一次所有版本嘅心愿。写下依啲版本啦：1976年伦敦概念版、1978年伦敦首演版（选曲，绝版好耐，旧年先再版，不过我已经有两张裸碟）、1979年美国首演版（百老汇版，我有两套了，推崇）、1989年十周年世界巡回版（选曲）、1997年电影OST（全剧、精选）。至于蜘蛛女之吻（The Kiss Of The Spider Woman）我亦收集齐两个大热版：百老汇版同今次买到嘅伦敦版，不过仲有一个维也纳版因为稀有，所以买唔到。歌剧魅影所有英语语种版，其实只有两个，伦敦版（我有一份87年绝版嘅旧版同00年再版），今次买到加拿大版，另外买到德国版（之前我已经有一张裸碟了）。至于红楼金粉（Sunset Blv.）就买多一张德国版，多伦多版未有货，另外买到50年原剧DVD，加埋我原先有两套伦敦首演版（我最推崇，可惜被某些人遗弃），一套美国洛杉矶世界首演版（其实比伦敦版迟，但係叫世界首演版）。真係觉得好幸福啊，虽然仲有好多未有买，不过有钱先啦，因为好多从德国、英国引进嘅唱片卖好贵啊，单张折合RMB都要成300以上。喺依到真係要多谢jj同学咁忙都帮我寄依啲嘢，仲帮我瞒税^_^

讲返学校嘅事，毕业论文竟然进度咁慢，有可能唔可以如期毕业了……至于奖学金，呵呵，朱老师，我真係唔识边个係朱老师了，反正係搞依啲工作架啦，南海楼二楼女厕对住果间办公室嘅，话我哋冇参加升旗礼，所以取消资格。讲真啦，如果钱多嘅话，我会好开心，因为我依排手头真係好缺钱，不过就算冇，我都冇所谓，首先觉得自己唔係生成咁嘅命，睇下啲老师开个仅差一分唔够学位积点嘅67分俾我（68分先可以攞学位），就知啲老师对我嘅睇法啦，呵呵，可能我平时唔识讨人欢心，乜嘢都讲到绝晒，不过，我冇删除依科低分嘅，虽然我学分已经多余了，绝对可以删咗佢，我都係算，拖低我积点都冇所谓，但係咁样都够积点攞奖学金？我真係唔敢谂，so，因为已经证明到我自己如果认真去背书（唔係读书）嘅话，都可以成为好学生，所以我已经唔在乎攞唔攞到物质了，可能，穷人就係咁样，精神上嘅满足比物质强好多。

至于工？仲未揾到啊，冇办法啦，屋企个退养（唔係退休）领导鬼咁清高，虽然退养在家每日都好多人揾，但係竟然拒接电话，连我都费事求佢了，呵呵，至于老母，都係唔求佢了，佢成日叫我：档案退返街道啦，等街道叫你去参军啊嘛，参军好啊——真係呕血死啊，等我真係提佢，先知原嚟佢识得啲hr经理，但係就喺佢成日叫我参军啦，签暂缓就业啦嘅同时，人哋都已经签完一批满人了，so，简直就係白求佢。依家又冇零用钱，又冇工开，剩係得日日三餐吊住，真係好冇瘾，依排消费都係靠食老本，银行储备都就快掏空了，先发觉自己原嚟一直係大洗咗，有零用钱嘅时候，银行储蓄都已经係缓慢下降了，依家冇零用钱，简直就係直线剧降，我谂，过多一个月，我就要开始举债了，真係咁大个仔都未试过……不如，都係先将自己嘅md、headset等等，卖咗佢筹一笔钱先啦……

• 0 Comments

寻日又听咗下Tosca，跟住睇多次DVD，每次听Tosca我都会喊……我想睇Salome，谂住今日睇，结果都係冇睇，主要係唔舍得成日攞出果张差唔多成400蚊嘅DVD。想听The Kiss Of The Spider Woman，不过都係冇听，每次听蜘蛛女之吻我都会喊……今日都係，谂下就已经想喊，可能係太，太唔知点样形容，蜘蛛女就好似毒药，可以缓解人嘅心理压力，使人暂时忘却所处嘅处境，麻醉挂，不过，毒药会毒死人，蜘蛛女都唔例外，蜘蛛女好美艳，令人沉迷喺虚幻嘅世界中，但係，蜘蛛女代表死亡，一旦俾蜘蛛女吻上，任何一个人都会死亡，依赖但係又致命，沉迷喺虚幻之后就係恐惧……so，我都係冇听，谂下就已经足够了，只係一啲旋律片断就足以令我麻醉一时。

• 0 Comments