寻日同kaysit讲和，不过真係好憎佢。下昼同佢去咗陶街，佢话要买二手耳机，结果连商店都揾唔到，跟住屈佢带我去一德路揾圣斗士十二宫模型，结果一样连商店都揾唔到。

返到嚟好攰个头好痛，又感冒，晚黑临瞓食咗药，结果今日朝早都係病倒咗，kaysit话请食饭，结果放飞机，都好，一嚟我病咗，二嚟我要返学，三嚟平安夜都係留返俾佢哋二人世界啦，双职工家庭边够时间浪漫架。

寻日下昼喺一德路，kaysit接到农行电话通知体检，另外佢原先就有上海浦东发展行offer了，好似係乜业务经理，全国旅游果只。我都费事同佢提上海嘅事，我一早就有预料佢嘅计划冇可能实行嘅了，依家话学车。算了，佢以后周围跑，大把机会，唔旨在依啲嘅了。晚黑阿姨喺QQ话我知签咗培正中学，佢都係做一年嘅嗟，跟住出国，临工都咁好，真係羡慕。

至于今日，因为病住，想复习都复唔落，瞓觉嘅时候比较多。中午煮虾子面食，晚黑就煲粥，实行饥饿疗法，因为我感冒一食饱就会发烧。晚黑返学忍唔住去咗睇界口碟，结果发现有张四季剧团嘅美女与野兽，谂住要20～30，结果问价，果个阿婶开价20，话係双碟，我话单碟架，佢唔信，另外果个男嘅过嚟睇，证实係单碟，阿婶就话15啦，果个男嘅即刻话15咁少，依啲起码20……阿婶话卖晒佢算了。因为之前有个男嘅买碟好烟尖，拣空盒都拣咗好耐，一个个拣，最尾又话黑色胶袋唔好睇，要另外果只胶袋，阿婶好嬲，话果种胶袋要两毫。——所以阿婶比较烦，懒得同我周旋。我听到15，心中窃喜，因为我银包入面剩係得15，如果20嘅话，我就要用轧袋嘅100蚊，搞到啲钱散晒，咁会好快用晒，而且咁嘅话，我会考虑多买另外一张DVD（美丽人生，法国）。俾完钱，我都唔好问佢攞袋，直接放入书包。乘机问你哋依到係唔係今个月要搬，阿婶答唔使搬了，原先要租俾其他人，所以要搬，不过后嚟人哋唔敢租，所以佢哋留返喺到做（搬係指全部界口碟档搬，当年我仲问另一间要咗电话同手机，谂住到时搬问搬去边）。最后阿婶话，出咗佢哋，依度边个人敢做啊（因为偏僻，做唔起），我笑笑，阿婶见我笑，勉强笑笑回应我。

晚黑上移动通信，张多英对期末考放水放得好犀利，甚至问我哋想考乜，真係好搞笑。

• 0 Comments

寻晚同亲戚去咗街口草原肥羊食，真係好饱。

今日中午，cheap精打我手机话我知Hugo Boss嘅俾人买咗，我真係好失望，好失望……

虽然窃喜有返500蚊用，但係……

• 0 Comments

今朝早醒，睇下床头手机，9点几了，今日东莞三星电机面试我係排2号，我谂都过时了，感觉出边好似落雨，瞓返。10点50到，阿妈打电话返嚟吵醒我，我冇起身接，继续瞓，不过无耐屋企两个钟都报时11点（两个音乐相同，相隔5分钟，一个老窦老母房，一个厅），都打11下钟声，吵死我了，唯有起身。睇咗下翡翠台『大宅门』大结局，跟住上网，发个短信问小周周面试问乜，答：个人介绍、成绩排名、性格。就业科BBS上面都有人写话面试时间好短，得两三分钟，问题简单，怀疑三星做show。12点到阿妈又打电话嚟，原嚟叫我煲汤落盐，我口头应承，放低电话继续上网。到1点3个字先去刷牙洗面兼起身到依家第一次尿尿，谂住顺便打火煲热啲汤落盐，点知一睇，原嚟煲汤着住火梗，我以为阿妈係叫我开火煲热落盐，原嚟佢冇熄火，嗱嗱声熄火，加咗啲滚水落去再煲过。梳洗完已经11点9了，又去上网，两点几先去煮面食。

今日继续下载圣斗士冥王篇第四集，第三集有字幕了，又睇多次第三集。字幕竟然係中大嘅动漫社做嘅。晚黑又攞到个广州游戏联盟修改嘅广州话版字幕，好搞笑。

• 0 Comments

• 查看留言请输入密码

• 查看留言请输入密码

• 查看留言请输入密码

本人考研报名果时喺华师即场影嘅电脑相（冚咗红印0架啦）。今个星期五我收到准考证，啱啱用DC翻拍落嚟嘅，可能打灯问题，凡係close up，我都显得块面好大，好肥咁。今晚我先攞出嚟认真睇下，撞啱老窦老母出去食饭返嚟（我从中午开始到晚黑一直一个人喺屋企上网，晚黑自己炒咗啲冷饭食），老母见到，我话唔考了，保卫处果边过两日就调我档案了，阿妈话如果我想去考就去考啰，你自己决定啦，我突然发觉原嚟佢係咁唔了解我，我想唔想考，想唔想做都唔知，当初我应承依份工就係为咗令佢唔好咁担心我。而老窦，平时都係随便我嘅，今次就毫无让步，要我去做，佢最中意拣冷门，认为人哋唔争唔代表唔好，反而应该把握机会。我当然知道如果我再埋怨落去，佢一定会话随便我，有啲嬲咁讲，放弃？心淡？不过我就係唔敢讲落去，我好小心咁讲，因为我唔想冇诚信，应承咗人哋做就应该去做，就算係一时嘅意思。

真係好苦闷，根本冇人了解我，根本都唔知我需要嘅动力係乜嘢，只要有依小小嘅动力，我乜嘢事都会好开心咁做落去，但係就偏偏冇人识得俾动力我。</p>

• 0 Comments

• 查看留言请输入密码

• 查看留言请输入密码

我觉得自己依两日真係心想事成，心入面谂乜就有乜：想睇AI，即刻就有张AI特别版DVD出现喺我眼前，想要interview？即刻就有，甚至係offer，不过后者我宁愿唔要。

寻日朝早一早赶去博闻上政治，预计喺华师入面行一阵就到，结果搭197，从197车站果个门入，一路行，行到华师嘅另外一头边缘，行咗横跨成个华师，仲要喺山上面，政法学院，验票入门口仲要排队，见返好耐冇见嘅小许，陈小许？跟住领材料，入到去已经上咗课了，係龙十一讲政经，我嘅位好前，第三排到，好清楚睇到龙十一，冇乜特别。我觉得考研嘅人好多都好低B，简直係傻B，个龙十一讲嘅所谓笑话一啲都唔好笑，啲人竟然笑到死死下。我左边一捞妹，笑得零舍犀利，怀疑特别低B，右边果个男嘅係果种以为自己好叻嘅牛人，一直撩佢右边嘅女嘅倾谒，人哋都唔理佢。龙十一讲话上课了，佢就同个女嘅讲（普通话）：一定要相信他，会帮你拿高分的。真係无聊，龙十一讲建议单选做完唔好检查，因为你写完自己个名，自己睇十分钟，都会开始产生怀疑。结果右边果条SB真係写自己个名落左手手心，仲要自己睇完之后递俾佢右边个女嘅睇，拜托，唔好咁弱智好唔好，最鄙视依种SB了。

跟住我发短信俾小鸣，问佢金四金融专场情况如何，跟住竟然打返我手机，打嘅竟然係小明，可能信号唔好，我听唔到声，就cut咗，跟住扮出去打手机，就攞埋书包出咗去，喺出边再打小明手机问情况。依个时候有个男嘅同小许讲唔见咗票，小许唔俾佢入，要先报失，费事佢卖咗张票。

打完俾小明我就赶返去暨大金四文化广场。去到大概9点半，喺场外见到小明走了，佢话小鸣仲喺入面，我就赶入去，打小鸣手机揾到小鸣，同佢兜咗几圈，真係好多人排队，我只係对中银东山分行有啲兴趣，不过招我哋专业嘅极少，而且实在太多人了，都係决定走。就係准备走嘅时候，我手机震，睇下，係我唔知嘅号码，接，一接就叫几次：“小黄吗？”我问“找谁？？？”佢先讲我全名，话係保卫处，我心头一震，谂，今次死了，又犯乜嘢事啊？定係叫我去协助调查？跟住佢讲话简历之类，我先谂返起我投简历去保卫处信息科嘅事。佢叫我去倾下……喺接电话之前，我仲一边谂咁多人有offer了自己连interview都未试过，一边同小鸣埋怨冇offer冇interview，结果即刻就有了，仲唔係“心想事成”？仲以为係interview，结果去到剩係同我介绍工作内容、方式、待遇，至于详细内容，由于属于保密性工作，我就唔写住了。佢一路叮嘱我话係保密性工作，唔好同同学提起，就算佢俾我嘅资料（一张纸），唔要了都要交返俾佢。依家我谂点样同小鸣讲，冲淡佢关于依件事所知嘅嘢。

睇到我以上写嘅你，亦请你唔好向其他人提起，保密性质係一件事，工作职位嘅低下係另一我唔想提嘅主要原因。

• 0 Comments