听日就最后一日假期了，依个假期乜都冇做、做成。

• 0 Comments

灵感枯竭好比行尸走肉……

今日朝早睇咗辣妹掌门人大结局，谂起好耐之前睇第一集，我都冇乜兴趣，不过睇睇下，可能係因为冇嘢睇啦，或者係我朝早迟起身剩係可以睇依出，最尾依部分都追得比较完整。大结局觉得大家都比较成熟了，面对嘅问题好似同我都差唔多。有啲失落，始终人老咗，陪咗一段较长时间嘅嘢冇咗，就会比较伤感。

瞓觉……

• 0 Comments

今晚部机死咁死机，嗒都嗒唔着。觉得自己冇晒灵感，就好似冇咗灵魂咁。

• 0 Comments

今日中午专登叫阿妈早啲煮饭，食完饭先12点几，我就出去岗顶揾清贵嘅CD。专卖日文果间揾唔到，无意中翻到一张日版美女与野兽嘅Original Broadway Cast嘅CD，30蚊，冇讲价买低。跟住去最尾果间，翻下DVD，发觉有新货，首先係普契尼嘅一出我唔知嘅歌剧，跟住我发现有张Carmen嘅DVD，日版，双D5，Maria Ewing主演，英国柯芬园皇家歌剧院1991年4月现场记录版，问价，开价100，因为我谂住问佢有冇清贵，有谈资，顺便讲下价，90蚊，唔压了，晚黑返到嚟睇下原价8500日元。至于清贵，佢话入过几张细碟同一张大碟，不过卖咗，话过两日有新货，应该会有。算，我真係唔好彩，同清贵真係有缘无分。谂住行埋其他几间，太多人了，唔想行，问下有冇清贵，最前头一间人多到逼实晒，我见到，干脆问都唔问就走人了。

Carmen嘅DVD係日本内销品，2区，印制真係好简单，不过质量几好，剩係得日文字幕，可隐，音效就剩係得LPCM，不过我中意，我觉得只有LPCM先係最纯嘅，我睇DVD音效菜单都拣LPCM，唔拣杜比5.1之类。

今日状态好差，做唔到嘢。晚黑得知谢霆锋俾定罪，开心咗一阵，仲上网声讨佢，大快人心。

• 0 Comments

今朝手机又闹醒我，我谂唔係放假咩？我明明教咗周闹钟，假日唔会闹0架，谂下先记起今日係星期三。

朝早陪阿妈去买餸，我以为係好似往常咁去超市，所以我着晒街坊装，着对冇鞋踭嘅白色平底鞋，结果点知阿妈係去市场，不知几污糟，地下又湿又滑，街市又臭，搞到我一直扯住条裤嚟行（因为平底鞋，所以条裤拖地），最尾都係踩到裤脚，搞到又湿又污糟，激死我了。

之后我上咗一下楼就去咗农林下路省音像揾清贵嘅CD，揾唔到，问个哥哥（其实睇样应该仲细过我，我学生样唔认老嗟），佢话未听过，好尴尬咁笑住答，真係好羡慕佢，笑得个样好cute，后生真係好，我就老了，唔得了。之后我坐192去海印揾，192剩係到大沙头码头，搞到我行咗好远先到省音像。我经过印正，见到四眼阿姨，扮熟问佢进口碟係唔係仲係果到买，佢话係啊，跟住有个肥阿姨话带我去，四眼阿姨唔知係真係认得我定係以为我熟，话唔使啦，佢识得去0架啦，不过肥阿姨都係带咗我去，我问咗有冇清贵，果度话冇，我就走了，再去省音像都係揾唔到。唯有赶返屋企食饭。

下昼瞓觉瞓到过晒龙，差唔多6点先醒，搞到睇唔到咕噜咕噜魔法阵II，搞到我心情好唔好，不过我依排心情都係咁差，都係咁低落0架了。

今晚用winmx排队down清贵嘅mp3，结果唔小心搞到死机，结果又要重新排队，仲要越排越后，到依家都未down到，觉得真係有缘无分啰～

今日收到来科思嘅e-mail，网站空间同域名又升价了，唉，我都已经冇晒钱了，睇下明年续费果时环境点，如果环境唔好就唔租了～

今日乜嘢功课都冇做，好多计划，但係一个都冇实施，好鬼死火……

• 0 Comments

今日朝早终于攞起5日冇掂嘅功课（实验报告），啱写咗两行字，发觉唔识，睇咗下书，都係唔识，决定唔做。到咗下昼再次攞起另外一份实验报告，发觉都係唔係好肯定，ADI编码转PCM编码，究竟点样算係偶数位，点样算係奇数位？係就咁数嘅奇偶次序定係由0排到7？都係返学问下同学先算，都係唔做住。咁今日基本上就解决晒假期嘅书面作业了。

朝早已经冇咗蜡笔小王国睇了，可能上星期就已经播晒，搞到我仲专程等嚟睇，真係好失望。

真係太神奇了！晚黑上网无意中试听咗下清贵嘅歌，点知一发不可收拾。我一向唔中意听埋晒啲细路仔唱嘅歌，何况清贵仲细我两岁零10日，仲要係0架仔，我好反感日本依啲小朋友嘅歌手，比如果个岚啊，w-ind啊之类。清贵，讲真，以前好似听过依个名，咁啱得咁巧，我依今日上网唔记得係查乜嘢资料，先见过佢嘅名，可能係大碟排行榜？平井坚都有，就係唔见Chemistry，平井坚又有新细碟，新大碟都即将推出，新细碟係日本嘅老歌？——古老大钟，我记得睇樱桃小丸子友情篇剧场版嘅时候有依首歌，喺小丸子全班喺歌唱比赛果时合唱嘅，平井坚唱得几好，PV都係坐喺到唱，好正经，我觉得咁先係唱歌。——扯得太远了，讲返清贵，我一开始真係好反感依类歌手，点知一听之下——哇！实在太正了！依啲真係R&B！比起Chemistry果啲，真係可以比较，不过风格唔同啦，听听下，好感慨，快歌处理得比起平井坚好好多，而深情嘅歌，去得好尽，佢音域好广，扯到好高，至于慢歌，真係软化心灵，我好有当初、当初仲细嘅时候，听欧美流行曲咁，係果种仲未好似依家咁俾舞曲侵占嘅年代，好轻柔嘅鼓点，真係好令人沉浸。我真係越听越中意，可能係因为係流行曲容易入耳嘅错觉？不过仲有好多难以入耳嘅流行曲又点解释？睇返清贵个样，唔靓仔啵，成个日版陈奕迅咁，可能冇陈奕迅好睇添……我谂过两日我可能会出街揾佢嘅CD……

今日又喺joyo买咗两张DVD，一张係后窗，主要係为咗买依张，以前一直冇DVD版，今日上去见到有，即刻就买落嚟，顺便搭多张罗马假日嘅DVD，费事买咁少浪费邮费，其实我都好中意夏萍姐姐，特别係果时明珠台播嘅记录片译成恋恋夏萍，我好中意咁读，好舒服嘅感觉，不过依个罗马假日係黑白版，不过算啦。另外用咗600分积分（等于买咗600蚊嘢，我已经买咗接近900蚊嘢了）换咗支钢笔礼物，谂住到时俾阿妈，睇下好唔好写，因为之前阿妈碟烂咗支好好写、写咗好耐嘅钢笔，佢记帐全靠幼笔，希望依支笔啱佢用啦。

心情好一般啦，不过我都已经习惯白天强颜傻笑，同学都指住我话：睇下阿真；你係唔係傻0架；一齐打佢啦……之类，觉得自己好似专登做小丑咁。

• 0 Comments

今日朝早放学同小鸣去咗买DVD，我终于买到十戒，中午一返到屋企食饭就开始睇，一路睇到差唔多4点先睇晒，两张碟，差唔多4个钟。睇完觉得几好，啲演员好有魅力，场面浩大，唔係现今电脑动画可以比拟嘅。剧情方面纠正咗我睇埃及王子果时对十戒故事嘅误解，埃及王子改编嘅地方真係改得太差了，而且好多动画镜头都係学足十戒，照搬入面嘅镜头，简直一模一样。睇完真係好攰，准备瞓觉，但係都係起身食饼饮Qoo，顺手开电视，竟然播星际漫游YA YA YA嘅大结局。寻日下昼我已经睇咗倒数第二集，果集我喺以前已经睇过（今次係第一次重播），剩係今日依集大结局因为今年年初开学果时返学冇睇到，今日终于睇埋，完咗我嘅心愿，觉得真係完美晒。跟住冲凉，瞓觉，老窦叫食晚饭我都冇乜反应，过咗好耐我先醒，都唔知瞓到乜嘢时日，第一反应係：死了，咁赖床，返学肯定迟到了——我行出房门先谂起喺乜嘢时候，即刻食饭。

见到高中嘅校友都好充实，有考认证嘅，有出去实习嘅，自己就好颓废，乜都冇做，连作业我都拖咗连续4日冇做，真係唔知自己搞梗乜。听日、国庆仲有好多嘢烦……

• 0 Comments

寻晚食完晚饭，玩下电脑，10点几觉得攰，就谂住小睡一阵先再起身玩电脑或者做功课，点知再醒已经係1点几了，因为电脑冇熄，都唔知佢自己经过几多次死机自动重启再死机了，我按咗下电源开关冇反应（我冇激活显示器，可能死机应该激活唔到了），就按4秒等佢熄，之后又继续瞓。

今朝唔係好早醒，冒住大雨返学，觉得咁先係学生，好有感觉，返到学校落车就基本停雨了。

中午食咗炒饭，用Qoo送，之后饮咗碗老鸡莲子花旗参，点知就胃痛，一路痛，好痛，痛到死，好彩老窦3点几返到嚟，问佢食乜药，佢剩係揾到吗丁啉俾我食（我都谂唔起有吗丁啉可以食），不过食完瞓觉都係咁痛，一路到5点1起身都係咁痛，又食多次吗丁啉，虽然食密咗，但係真係好痛，冇办法。食完药冲完凉都係咁痛，咁啱阿妈今晚煲咗花胶汤，话对胃好（分明就係以形补形啦），就俾咗半碗热汤我，饮完好似真係舒缓小小，老窦见我仲係咁，就即刻落街买咗盒达喜俾我，食咗两粒，唔到30分钟，真係唔痛了啵，跟住我可以食到碗饭添，跟住再饮汤食西瓜，冇问题。今晚又冇做作业，冇温习。

我好担心我出嚟做咁低工资会搞到屋企唔够钱开饭，生活简直会差过依家好多，今日我自己计咗一下，出嚟做之后，使钱仲要唔可以好似依家咁大花洒。同老窦老母讲话惊会唔够钱开饭，佢哋话咁唯有悭啲啰。唉，真係惨……

补寻日星期五，朝早上课见到小明只手俾我插果度伤咗，好大个伤疤，我好内疚，唔知点同佢讲，不过佢已经冇回事，算啦。下昼做刘敏嘅实验做到好迟，结果返到屋企已经好迟了，睇唔到咕噜咕噜魔法阵II。

• 0 Comments

寻晚一路下载到逼近两点先下载完Red Shadow（赤影），结果忍唔住睇咗啲，搞到差唔多3点先瞓。不过只係今朝起身有小小眼瞓，成日一直都唔会眼瞓，中午都剩係瞓咗唔到半个钟，因为赶住做实验报告，其实时间好充足，唔赶，只係有啲唔识做，要赶住问人。

今晚上课知道要上学校网站就业资料果到登记，中午喺挣扎宿舍都听咗佢哋讲对于揾工嘅问题，佢哋果间劲人宿舍都个个担心唔够技术应聘，我真係唔知点算。Scut已经有保洁去咗招人了，晚黑同学同我讲jnu嘅宿敌zsu都仲未有，我都开心啲。下昼做实验我拉断咗录音机嘅马达嘅电线，搞到挣扎要焊过，觉得我自己真係好冇用，乜都唔识做，成日靠人哋帮手，实验都係挣扎做晒。黄楠过嚟登记打印成绩单，免费四份，10月嘅6个学期，3月嘅7个学期，我拣咗要10月嘅，咁如果我3月要，就要每份30蚊去打了，依家虽然可以删除唔要嘅低分课，但係依家删就冇得改了，我都係冇把握依个学期会好。真係好乱，晚黑上课，因为考研同揾工嘅事已经好烦，简直就係双输嘅感觉，小明又嚟弹住我，搞到我鬼咁痛，嬲嬲哋我攞活动铅笔插佢手臂，搞到佢低落晒，唔多理我，可能真係好伤，之后成节课一直到落课佢都用手按住俾我插到嘅手臂，成个人静晒，虽然安静啲好，但係我好内疚自己咁大个人都自制唔到伤害到人哋。

返嚟上网填就业资料，发觉自己真係冇料，真係，心情真係唔好，从前一段时间已经好低落，一直到依个月头，每况越下，真係好烦，好迷茫，研就係考唔到嘅了，工又难揾，就算揾到我都惊自己胜任唔到好快俾人炒，真係冇出路，觉得自己真係一无是处。真係好希望喺跑马场用两蚊抽中100万，咁我就有钱继续读书了，咁双亲都可以安慰啲……

晚黑唯有睇赤影嚟麻痹下自己，真係冇乜好睇，除咗靓仔靓女之外，特技剧情都係好一般，但係好多演员都好有气势，好有日本古装武士片嘅感觉。虽然胜在DVD版画质音质好，不过睇完冇乜尽兴嘅感觉，冇荡气回肠，有小小失望，一直睇到啱啱先睇完，觉得好失望，觉得部片好失败，东映50周年纪念竟然拍出咁失败嘅片，又好失望，觉得好可惜，原先谂住安藤政信可以凭依部片更加出名，甚至冲出日本，迈向国际，令西人都认识到安藤政信，但係依家睇嚟可能性唔大了，虽然，安藤政信嘅演出确实好好……作业都冇跟住做，书包又未执，唉～心情真係好差，持续咁差，一路低落……

• 0 Comments

寻晚先发觉原嚟记录来访IP嘅cgi程序出咗问题，其实从9月8号我就觉得记录嘅IP有啲怪了，不过冇在意，寻晚觉得实在太离奇了，唔同连我自己嘅IP段都改咗，查咗一下先发觉依段时间记录嘅IP都係我嘅域名解释商chinadns.com对应于我域名嘅动态IP，依家睇一下，其实问题最早喺8月24号下昼就出现了。我上网搜索关于真实IP嘅资料，不果，唯有去全国最大嘅cgi类论坛lb官方论坛询问，结果帖子挂都依家差唔多24小时了，我自己仲up咗一次，都冇人回复，睇嘅人都唔係好多。我真係再一次体现到国内上网人群嘅技术水平低下，就好似上次我去另一著名cgi论坛官方论坛询问点样删除权限唔同嘅cgi生成文件咁，就算有回答嘅一睇就知最多係初中生充嘅，最睇唔起依啲人。至于叻嘅人对技术守口如瓶，唔係商业交易就冇得倾，简直就係冇钱穷惯嘅乡下佬，我亦最憎依种人。今日中午食完自己炒嘅炒饭，谂下都係要靠自己，就下载咗lb论坛嘅源代码落嚟研究，成1.8MB嘅源代码唔知点睇，我又用咗啲时间揾咗个批量修改扩展名嘅软件（之前试咗不下5、6个都用唔到），将几百个cgi文件扩展名改成txt，再用windows嘅搜索功能搜索其中嘅函数，终于揾到有用嘅代码，根据代码修改咗我自己嘅cgi源程序，一试就ok了。我用依几个语句去搜索大陆yahoo，一篇资料都冇，搜索英文yahoo就搜索咗好多相关资料，睇咗下，虽然唔係好明，但係算有个了解。其中有篇big5码文章讲到“在所顯示的眾多environment variables中，有些是只有經過proxy才會出現的，當中包括HTTP_X_FORWARDED_FOR、HTTP_CLIENT_IP、HTTP_FROM、CLIENT_IP（通當是你的IP）及HTTP_VIA（通常是proxy server的名稱、版本等資料。”我就去试下用代理测试我自己嘅IP记录，发觉都係唔可以记录真实IP，再同样去lb论坛，发觉lb论坛都显示唔到我嘅真实IP，试下asp类论坛就可以探测到我嘅真实IP，睇嚟依个係cgi同asp嘅距离，我就唔理佢了，反正我已经了解依段源代码喺lb嘅边个部分，或者讲点样样去揾依段代码出嚟，咁我就可以同lb同步更新了。

上51digi嘅论坛，见到人哋俾我嘅悄悄话，话俾我听Red Shadow嘅下载站点，我即刻去下载，食晚饭我都开住，点知食完饭发觉已经冇晒，部机应该自己重启过，搞到我下载个半钟嘅心血冇晒，仲要速度好慢，依家重新重头再开始下载速度更加慢（重启后flashget日志文件丢失），成700几兆，真係激死我，依部咁嘅烂机，等我有钱，即刻换西咗你，先抌烂你而后快！

• 0 Comments