朝早坐车去车站坐车，喺车上见到路上开始有初中生返学了，咁我都安慰啲。

今日上高数真係好闷，足足又记咗一本单行簿嘅笔记。中午同同学搭咗一个站车去M记食嘢攞流氓兔公仔，我其实并唔係好感兴趣，不过同学好似好中意M记嘅公仔，次次有公仔都去都去攞，上次就Hello Kitty。中午都係啱啱够时间食完返返去课室上课（午饭时间12:00—1:00），冇瞓中午觉，一路靠同同学倾谒打闹坚持到5点钟落课。原先谂住要赶返scnu上政治，又要捱冇空调嘅音乐厅，点知今日係留返喺gdut继续上。结果我哋嘅号码比数学嘅前，所以坐得比较前，空调都冇咁冻，之前早上我仲带咗衫（高中的确凉校服）去着，不过下昼开始就唔使了，晚黑比较前嘅位反而有小小热。晚黑果时讲政经嘅係人大小徐，又係果啲食吹又中意乱噏嘅人，氹到啲学员鬼咁开心，上课成日陪佢笑，不过我唔觉得全部都好笑，依啲只係佢识得演讲嘅技巧，可以煽动果啲人，并唔代表佢讲课真係讲得好。不过总体嚟讲，都过得去啦。

晚黑喺gdut饭堂二楼食，小许话係经过佢联系，饭堂同意开放二楼方便我哋就餐，其实，同学明确指出，人哋饭堂门口一早就大红纸牌写明今日开始营业（因为就快开学），我果日都睇到，只不过冇认真读内容。而小许就自己揽晒上身，真係噏得出就噏。二楼饭堂环境仲过得去，从一般嘅快餐台到铺台布嘅大圆台到装修比较好嘅房都有，有微弱嘅空调，有几个男侍应喺快餐台果边扫骨，着晒酒楼果啲侍应嘅制服，喺学生饭堂咁，真係令人费解，仲有几个女部长行嚟行去，房间入面都有女侍应。价格同便价快餐店差唔多，我要咗个7蚊嘅酱烧排骨饭，结果配菜係我最憎嘅黄芽白同两够煮冬瓜，而果啲所谓酱烧排骨就好差，一啲火候都冇，又淡，得大大够咁三四够，简直就好似煲完汤嘅排骨咁。而同学要嘅鸡肶虽然烧到好似炭咁黑，不过好似仲好过我果啲咁。而米饭就一够够，又唔够热，质素好一般，有免费嘅汤攞，係紫菜汤，不过好淡，同jnu果啲免费汤差唔多。仲有免费嘅豆豉豉油青辣椒同咸菜免费提供，我最中意前者0架了，攞咗好多，基本上靠佢送饭，我食咗大概5成嘅饭啦，垃圾排骨就剩係试咗一够就接受唔到了。

下昼数学班放学果时喺门口迎面撞到广大仔，同佢打咗招呼，终于算係相认返。同学问佢点解嚟咗依度，唔係lh嘅？佢话都係觉得依到好啲。

今晚喺QQ到见到同学先谂起寻日逃课都唔识得去参加同学聚会，唉，同学咁就出国留学了，我冇add佢QQ，结果激嬲佢，搞到啲同学话我无情（我笑）。同学都好似有啲伤感，唉，可能走走下，会越嚟越少人。

• 0 Comments

今日朝早我都好早醒，但係我唔想返学，因为今日时段同寻日一样，成日冇空调，会好辛苦。所以我发咗条短信俾同学问佢返唔返，跟住我就瞓返唔起身。不过接近7点我都係起咗身，梳洗，正常咁食早餐，吹头，不过我不断咁问老窦老母想唔想我返，佢哋都话随便我。我同老窦讲好辛苦，老窦叫我揾啲唔辛苦嘅嘢嚟做。——点可以咁，我自认唔係唔捱得苦，但係果仲环境会死人0架。最尾同学复我话返，我就问佢有冇空调，我已经准备换衫走人了，不过我瞓喺到等佢复我，结果过咗一段时间佢先复我话冇空调，我就继续瞓，一瞓就瞓到10点几先起身睇电视。

11点几同学发短信话叫我返，话佢想唔返了。中午食饭果时同学打电话嚟话佢返到屋企好舒服咁叹空调了，提议我哋下昼同晚黑一人返一段，咁冇咁大损失，而我就坚持唔返。最后我哋都冇返。同学下昼去咗购书中心买书，打电话俾我问使唔使帮我买埋，我一听，死啦，我之前已经买晒，只不过一直冇机会同佢讲，而我冇帮佢买埋，因为我都係喺网上买嘅，我觉得网上买由于送货问题，冇必要帮手，我都係坚持个人自己买就得了。依家咁真係好尴尬，都唔知点同佢解释。

虽然我唔返学老窦老母冇话我，但係就粒声唔出唔睬我。今日已经差唔多病好了，不过听日上课会好辛苦……

• 0 Comments

寻晚好早瞓，今朝竟然可以自然醒（不过分别係因为食咗药同埋病痛所致）。今日朝早8点正就喺gdut上课了，空调实在係太冻了，落课唯有说服同学陪我坐埋旁边啲位——虽然睇投影冇咁清楚，不过点都好过冻死。11点数四嘅内容上完，数四离场，一下子走咗好多女嘅，连“友阪理惠”都走埋。今日我又不断咁望“友阪理惠”，发现佢个下巴始终唔够友阪理惠靓，又唔够友阪理惠高，最大唔似就係波太大。我又望咗几次广大仔，好似佢都有望过嚟，我即刻缩返。

上上下课见到我哋班平时好cool好稳重成熟好少笑嘅才女竟然同隔离个男嘅咬耳子，跟住仲偎依喺男嘅脖头到，又抓住男嘅下巴喺到打闹，睇到我哋呆晒，有冇搞错，依个点会係我哋班嘅才女，真係吓死我哋。——不过之后放学我哋先发现我哋认错咗人，真係吓死，好彩，我哋班嘅才女并未离开我哋。

中午12点先落课，即刻去寻日发现嘅you & me bar食中午饭，6个同学同台食饭，结果我果份海鲜炒乌东等最耐，虽然部分同学嘅都上得好慢，但係个个都差唔多食完了。我催第二次先上，仲要上错汤乌东，我梗係唔肯过佢，过多一阵佢先上过啱嘅俾我，果时已经1点9了，好彩啲乌东量好少，我草草食咗小小就同同学一齐埋单。果啲同学好多都未同过一齐食过嘢，个个劝我慢慢食埋佢……依间bar啲服务态度认真差，啲客人催就敷衍话：（大意）又唔係我唔想出俾你，厨房出到先得架！我哋同学催佢快啲，果个女侍应好敷衍咁话煮梗啦，我哋一齐哗：乜嘢态度啊！有个其他台嘅学生哥哥去柜台问做乜咁耐，连迟过佢哋嚟嘅其他台都差唔多食完了，果个女侍应（另一个）态度超级恶劣，竟然话：依度又唔係快餐店，……成日嚟烦住晒！

下昼1点就上课了，一直上到3点落课，即刻专车送我哋返scnu。喺车上面我发吽哣，同学问我做乜呆晒啊，我话：我喺到节省梗体力。——节省体力即成为发吽哣嘅代名词，果日之后上课由于好辛苦，我都不断咁利用依种方式嚟节省体力。

结果3点8到课室即刻开始上课。我喺scnu门口上次买单行簿果间店再买多5本单行簿，先前问清楚佢，果然係3毫纸一本，不过我懒得同佢讲佢上次收少我钱。上咗一阵课就突然冇空调了，结果热足全场，又係靠果啲把把都吹唔到我嘅风扇嚟撑，好彩空调未停之前我摊喺张凳到完成咗午睡，结果瞓醒发觉老师仲未入正题。一直上到5点9，个老师先话休息10分钟，我哋个个愕然，不过小许即刻上去话考虑到食饭问题，6点10分再上课，车！先几个字，边到嚟得及去喺学校另外一头嘅饭堂食饭。我哋嘅同班同学都话走，我同同学都犹豫走唔走好，我发短信返屋企，问佢哋挂唔挂住我，想唔想我返屋企食饭，老窦剩係话随我。结果我同同学决定用抛银仔嚟决定去留，结果衰咗，係留低嘅。我哋喺超市买咗啲食品就返课室食了。我顺便又同果个阳光男孩买咗份《南都》（到依家都未得闲睇），结果佢俾咗手上果份有小小烂嘅俾我，我仲犹豫咗一阵，睇下佢俾唔俾份新嘅我，结果冇，不过算啦。好多人都买包食，又有好多人买饭盒返课室食，结果6点4先开始上课，我当然照样继续食嚟抗议……依晚食咗罐泰奇八宝粥，三个翻版日本乐天蛋糕仔嘅杂牌蛋糕仔（质量可以接近乐天），一杯喜之郎CC（后记：佢话富含纤维，第二日我确实感觉到了……），食得好狼狈，而且课室环境太差，真係好唔舒服。结果热咗成晚，终于等到8点，以为8点半就可以放学了，点知老师问我哋休唔休息10分钟，之后上到9点，结果我哋：哗！老师就话咁唔休息了，上到8点50啦。我真係挨唔住了，果度嘅气温简直好似焗桑拿咁，又透唔到气，我一直接近要晕嘅状态，我实在忍唔住，同同学话我要走了，结果同学叫我捱埋佢啦，都捱咗咁耐，坚持埋佢啦，我唔制，结果又用掷银仔嚟决定——最后我係留低。我觉得其他果啲学员真係有问题，都唔知係唔係大脑机能有问题，咁热一啲反应都冇，简直就係行尸走肉，好似鲁迅讲嘅果啲闷热铁屋仔入面嘅人咁，麻木到死，我觉得我竟然同依啲人喺埋一齐，真係好恐怖，好可悲。不过或者佢哋吹到风扇，而我咁啱係喺成个方块嘅中间，乜都吹唔到，所以我零舍觉得辛苦挂。

今晚197我上车嘅站好少人，有位坐，不过之后就好多人上车逼了。落车果时已经9点半了，我真係好攰，发晒吽哣咁喺到行返屋企，跟住就发现唔记得等下车，一部可以返到屋企路口嘅183喺我身边开过——唯有自己行返屋企啦。

我冇晒意识，节省住体力咁行，突然发现前面有一个长发丰满女，我就不断咁望住佢扭摆住嘅背影节省体力咁行。突然丰满女急刹，吓到我都即时停咗落嚟，原嚟係过梗马路有车，丰满女停低避车，真係好彩，如果唔係跟住佢，我就可能俾车撞了。我学咗某人果招，行快两步，企喺丰满女左边，假扮睇车等车过，偷望咗下丰满女——正！

晚黑返到屋企，阿妈整咗啲皮蛋瘦肉粥同叮咗啲香肠俾我，而我就一边食一边讲今日点辛苦法，结果佢哋粒声唔出……

• 0 Comments

今朝起身就知自己嘅病恶化了，虽然寻晚好早瞓，今朝甚至可以早醒，但係确实病得犀利咗。往日出门我都同阿妈讲：好攰啊——阿妈闹：成日叫攰！——我讲：唔返得唔得啊？——阿妈闹：做乜唔返啊，唔得！……（跟住俾闹一餐）。但係今日我就实在太辛苦了，粒声唔出（係出唔到）就走咗。

522好舒服，有空调，有位坐，而且靠背好高，可以枕住个头瞓觉，但係我唔敢，第一次搭去gdut生活区，要留心睇站。结果我7点50左右就到步了（8点半上课），上课前见到好多同班同学，佢哋多数都剩係报咗数学一科。

中午去到饭堂，发现太多人了，因为上数学个bw成400人以上，个饭堂又剩係开一楼，面积好细，啲台凳好少，而且环境好差，最衰就係gdut生活区近住门口起梗一栋新嘅可能係学生宿舍之类嘅楼，结果有部分民工都喺饭堂入面食，点可以咁样0架！即刻叫同学打手机问gdut嘅同学边度有嘢食，结果俾指咗出门口——买盒饭！有冇搞错！而且一样多人。我谂住买包食算了，不过见果间所谓西饼店，好担心佢嘅卫生……最后又俾同学嘅同学带返入学校，去到饭堂旁边嘅小食店，其实就係大排档，好杂，好多民工，好污糟，我始终唔放心，最尾同另一个同学去咗旁边嘅一间所谓冰室食。我叫咗龟灵糕同牛丸汤米粉，龟灵糕即刻有食，但係米粉就迟迟未见，太多人叫嘢，厨房又少人，得两个女嘅落单、上菜、收钱，做到踢晒脚，好多人都等咗好耐，鼓噪晒。我等到差唔多最后，忍唔住质问个女嘅，佢好似敷衍其他人咁敷衍我话煮梗，之后先返转头话唔好意思，唔记得咗，我好嬲话唔要了，佢话即刻整俾我，我最主要惊搞到太迟，中午唔够时间休息，因为迟咗落课，下昼又早上，而且今日病住唔舒服，心情好差，所以态度咁恶劣，喺佢行开我仲闹佢：冇波又冇脑。之后谂返觉得过分小小，起码平时我都唔会对人咁苛刻，因为我觉得出嚟揾食係好艰难嘅，应该体谅人哋。之后米粉都好快到咗，质素中下，我食咗小小就埋单走人了。龟灵糕2蚊牛丸汤米粉3蚊。

因为发现好多人出入饭堂旁边嘅楼梯，而同学又确认饭堂二楼係冇开嘅，所以之后我同同学就上楼梯去探察一下了。结果发现二楼快餐部确实冇开（未开业），而三楼有一间bar，有饭食，环境好，仲发现两个我哋班嘅同学食完出嚟，不过佢哋都係靠识人带路嗟，好啦，下次先去果度食。

中午发现我哋班米七几高而且积点一样好高嘅我哋班嘅才女都有嚟上数学，佢使唔使啊，咁犀利，实保送啦。坐落又发现前面有个女嘅好似友阪理惠，我望多咗几眼。虽然有部分美女，但係亦不乏猪乸型嘅……唉。下昼上课同学话离远见到广大仔，我望过去，真係见到同我哋一齐上英文坐喺我隔离嘅广大仔，佢都好似望咗过嚟几次，不过我哋冇同佢相认，而佢就一路同佢身边嘅女嘅讲笑。

下昼上课啲空调太大了，好冻，吹到我哋啲簿都掀起晒。我原先就病梗，而且今日着得好疏爽，结果冻到我流晒鼻水、起晒鸡皮。终于喺第二次落课我提议同学一齐坐去一边最后果度，冇咁冻，不过结果睇唔清楚投影……我支点38啫哩笔又突然冇咗粒珠，原子笔之前就已经写唔出0架了，结果听唔明睇唔清记唔到笔记（不过都唔够簿记了，我悭住嚟写，都已经抄咗差唔多一本单行簿了），斋坐，不如早啲返屋企养病好过。我同同学讲声就走人了。因为听日嘅课密，所以今日老师话延长到晚黑七点，我六点15就走了，正常係5点半放学。今日上数学嘅学员果然唔同之前上英语、政治嘅，之前果啲老师讲课时间唔足，佢哋就鼓噪、抗议，延迟就鼓掌、支持，而今日老师话延迟，依啲学员反而鼓噪……

我一出校门上天桥就见522，冲落去啱好赶得上，不过冇乜位坐，但係唔逼，而且三个站嗟，但係中山一立交塞车塞咗好耐，因为我病梗，对车入面嘅空调好感唔大。7点返到屋企，同阿妈讲：好辛苦啊——全靠病梗，冇人闹我逃课又怨攰。不过听日更加辛苦……

今日先知道原嚟新荔枝湾都未够级数，gz最劲最贵最高卡司出品最好嘅酒楼应该係利苑（潮式），可惜我从嚟都未有机会……

• 0 Comments

今日返去scnu上课，点知音乐厅空调仲係未整好，结果鬼咁热。上课前小许又嚟同我哋道歉话果个老师寻日体检，发现下腹部有肿块，因为急住出国，所以好紧张，又未查明病因，所以留院吊针。话果个老师极力推荐咗依个北大嘅博士嚟同我哋讲课，而且因为依个老师係临时从太原赶嚟救场，佢原先喺果边仲有课，所以今晚就要赶返太原，所以今日剩係上上下昼，又冇理我哋有冇应承，就话为咗感谢大家对bw嘅支持同信赖，补返两次俾我哋（我即係大叫：死啦！做乜补啊！咁仲边有得休息啊！），跟住小许就话上课，并鼓咗下掌，原先其他学员已经鼓噪，而且有人大声质问了，所以根本冇人鼓掌，但係我就跟住鼓掌，同学即刻闹我：你做乜鼓掌啊！我话：咁……咁佢靓仔啊嘛。

依个老师都唔係等闲嘅，一开始就话如果大家听得唔满意可以同bw提意见，换其他老师。我发现依个老师（男）仲有一个跟班（又係男嘅），而且两个人都係差唔多四十到，果个跟班就执头执尾，再顺便喝小许做嘢（好似小许係名，因为佢哋叫佢做小陈）。

中午我行咗出西门买可乐，因为我今日又开始病了，靠可乐嚟止痛。返返入学校时经过校门报摊，见到《南方都市报》嘅人喺到推销，今日朝早返学果时我就已经见到嘅了，先係一个四眼仔，不过我依家仔细睇，佢着嘅係“发财狮子”嘅衫，可能係《信息时报》，而《南都》嘅係一个活泼阳光男孩，早上见到我经过就叫卖起身，不过我即刻拧歪面，冇理佢。中午再行过，见到佢仲企喺到，我心谂：睇佢都係学生哥嚟嘅嗟，稚气未脱，而我因为已经去到u嘅极限年级，目下都係师弟师妹，我从前一段时间开始就发觉自己开始好怜爱依啲师弟师妹，所以见到佢咁辛苦，我就帮佢买一份。佢好热情，即刻递佢手上嘅俾我，因为我手上揸住好多嘢，一时攞唔到，佢喺我攞到之前，又即刻话：唔好意思，攞份新嘅俾你。——佢就喺摊到攞咗一份新嘅俾我。当然，我认为係佢手上嘅係已经排好嘅，如果佢俾咗我，咁佢就要重新攞过一份嚟排，并唔係话真係完全係周到嘅服务，不过，或者係我自己多心嗟。

中午食咗两个包，虽然我好憎食包，睇咗下报纸，就听住MD瞓咗了，虽然坐喺到，挨住瞓，比较热，不过都几舒服，一瞓就瞓到点8。

结果下昼上课，可能係由于上昼落课果时啲人上去吵，结果个老师话上课延长到晚黑7点，跟住佢9点就要返太原了，问我哋可唔可以。（我）有冇搞错！虽然原先今日安排係朝早下昼加晚黑，但係今朝讲咗剩係上朝早同下昼两段，依家嚟话上到7点！我梗係话唔可以啦，不过我势孤力薄，好细声，而其他人都係好大声咁、好开心咁一齐大叫可以！——有冇搞错，惊死蚀底咁，啲人咁卜0架！我突然觉得同埋依班人喺埋一齐真係好惨、好恐怖！一直到4点几5点，音乐厅先终于有返空调，先舒服啲，因为虽然原先搬咗好多落地扇嚟，但係我坐喺中间，前后都吹唔到，焗到死，仲要透唔到气，成身汗，简直接近热死、休克嘅状态。

终于差唔多到7点先落课，搭咗部197返屋企。197一向都好多民工、农民、地摊农民搭，真係好恐怖，好邋遢，不过算啦，我都已经一身臭汗了。

返到嚟都已经7点半了，先去大西豪买饭盒做晚饭（因为阿妈唔返嚟食，老窦又唔预我，竟然叫我自己买宵夜，大佬啊，我连晚饭都未食啊，仲宵夜！），途径市场发现一个靓女，仲同我对望咗一阵，不过我谂佢望我係因为佢好奇点解有条友咁残咁骑呢嘅——真係好惨啊。大西豪咁夜，都已经冇乜种类嘅饭了，想试新都冇，唯有照旧要吉列猪扒饭加例汤打包。返到屋企洗衫冲凉，之后先食饭，开始食饭都已经係8点半了，唔知点解依家啲猪扒少咗，都唔够送饭，算。食完饭又食咗好多药，太忙了，再病落去都唔知点办。

食饭果时又睇返好耐之前买嘅茶花女歌剧DVD，发觉各个版本嘅演出演唱有一定差别，以后先总结啦，病梗唔想打咁长了。不过茶花女真係好感人……

病，早啲瞓，之后连续几日都係朝早、下昼、晚黑三场，有几日朝早仲要提早，下昼仲要提早……死了，真係死了……

• 0 Comments

真係好黑仔，寻日先突然谂起要存学费入银行，结果晚黑打电话一问同学，发觉原嚟20号係deadline，唯有今日一早即刻去入钱。阿妈剩係攞簿去入，结果因为要换新簿而且要身份证先可以入钱，结果要我亲自去搞。我去完中行攞钱，跟住去错咗建行，结果等去到工行果时攞到张筹已经係147了，当时先叫到接近100号。好彩，谂起用ATM存，一阵就搞掂，不过仲係坚持等到我。咁啱得咁巧，又係果个柜台，又係上次果个公行姐姐，服务态度好好，而且又生得靓，简直就係工行公主。佢叫我去返开户行换卡，或者唔好换卡住，咁冇乜嘢做啦，走人。

今日一早8点半就俾人打我mp吵醒我，跟住同佢去食早餐，食咗我期待咗好耐嘅粉肠粥同埋猪肉拉肠，拉肠唔错，不过粥一般，太淡，而且粉肠唔够鲜甜，觉得有啲可惜。跟住俾人呃咗去电脑城白转一圈。搭车果时发现原嚟我一直打错Teem Plaza做Teen Plaza，死啦，当年我考四级英文作文都係写咗Teen Plaza添，唔知改卷老师有冇扣我分。再之后去咗睇打口碟，买咗张Fosse同Mame，前者开始以为係Follies，买返嚟对返英文串法先发现，不过算啦，都係音乐剧嗟。同埋喺打口碟果度发现有好多日产正版DVD卖，其中又有我对上果次喺隔离一间铺买嘅“被偷听的人”DVD，仲要仅售30蚊，搞到我上次买贵5蚊，不过算啦，我都係果句，相信都係缘分嚟嘅。

• 0 Comments

今日一早去咗北京路，第一次上咗马桶睇，发觉上面果啲嘢都係好街头嘅服饰，烂身烂势，简直就係烂仔烂女飞仔飞女着嘅，真係cheap到死，同我想象中真係差好远。

喺pizza hut果时（其实我已经破产，好彩有富婆做东，先可以食返餐正常啲嘅嘢）特然收到bw嘅短信，话听日嘅课因故再度延迟，原先係话听日因为老师出国所以推迟到晚黑6点8先上，上到8点半，依家完全唔使上，又放多一日假，好嘢！不过谂下听日係我嘅最后一日假期，真係觉得好可惜。原先仲谂住话难得三日，可以揾日同啲人聚下，不过自己出唔起钱，依家变成四日都要自己喺屋企自慰了。

• 0 Comments

成晚喺到谂剩低嘅几十蚊要点样用先可以捱到开学，冇钱，我之后嘅两个星期都唔知点样食饭，冇钱，朋友都冇埋，冇着数真係冇人骚你。

结果下昼听咗一次今日中午买嘅Callas嘅La Traviata，觉得……唔，我啲咁嘅音乐修养听唔出乜嘢，剩係觉得好好，但係音质真係好差，好多地方真係完全失晒真。

之后我又从头到尾听咗一次Chess，觉得一般啦，旨在增加自己嘅音乐剧收藏嗟，因为音乐剧嘅唱片太难收集了，可与不可求。

晚黑我又再听咗一次La Traviata，顺便上网查咗下资料，先知道原嚟依个1955年喺米兰史卡拉歌剧院嘅录音其实喺我买开嘅Callas系列入面都有，都係中价版，我买开嘅依个系列中价版都係有纸盒包装嘅，只係颜色同正价唔同。依个录音评价有赞有弹，弹嘅主要係音质问题。睇返我买嘅依套，出版日期竟然係1990年，即係已经12年了，係EMI早期出嘅数码混音系列，喺德国压碟，依样优于现时我买开嘅Callas系列，因为依家EMI都係喺荷兰压碟，据说德国压碟质量最好，荷兰就好差。

冇钱嘅日子，我剩係趴喺张床上面，用电脑播依出La Traviata，静静咁听，冇其他物质生活可以再谂了，亦冇其他乜嘢所谓朋友嚟奉迎，好寡，不过好彩有音乐陪住我。但係La Traviata嘅故事太悲了，果仲见到曙光但係却立即绝望嘅心情真係好令人刺痛。

• 0 Comments

今日12点几出门，2点就返到屋企了。我先搭225去咗农林省音像，跟住搭地铁去咗Teen Plaza，最后搭178喺邨口落车行路返屋企。其实农林下路同埋Teen Plaza我寻日陪阿妈行街都行过晒，不过谂住留返今日行，所以我冇上省音像，喺卓兴攞起张碟，冇买，放返低，谂住今日买。仲拉埋阿妈去购书中心，等今日唔使去，减轻今日嘅负担。今日删减咗去HY嘅行程，原先想去HY探老板娘先，不过冇钱了，冇钱就冇得探，仲有石牌，因为想买Glay碟嘅人唔去了，所以我都冇去。

喺省音像，原先係谂住买Caballé（卡巴叶）嘅精选，因为佢果度只係卖150，三CD中价版，加埋我嘅9折券，真係几抵，但係我手痕痕买埋张Callas（卡拉丝）嘅La Traviata（茶花女）1955年嘅现场录音，听讲现场观众嘅激情可以刺激Callas嘅表演，使现场演出更为精彩，而且我有Callas喺1958年嘅茶花女现场录音选段，觉得唔错，所以就买咗今日依张中价版。但係依张唱片后面写住话虽然EMI使用咗当时最先进嘅混音技术，但係仲係出现咗变调嘅音质问题。唔通依个係一个失败嘅录音？冇所谓啦，我对音质要求唔高，我更加追求嘅係表演所散发嘅感情，所以我屋企除最佳录音外，仲有好多係属于历史录音。之后我就执买Caballé精彩选段。最后我好唔想面对，但係我都强逼自己去接受现实，再去睇咗下Eminem嘅送DVD限量版，结果发现已经唔喺VCD部了，窃喜，以为已经俾人买走咗，但係一谂，我行去CD部嘅Eminem栏，果然喺果度！不过剩係得一张送DVD限量版，其他都係普通版，希望佢可以快啲俾人买咗，等我安乐啲。

依个时候奇迹出现了！可能係Eminem送DVD限量版嘅神奇指引，原先我谂住睇咗VCD部就俾钱走人嘅了，点知依家行咗嚟CD部，一睇隔离发现一套Chess音乐剧嘅CD！我先前早有所闻依出音乐剧，睇下，係Tim Rice填词！正！再睇演唱者，竟然有Patti LuPone，哗！一定要买！（其实係我睇错，其实果个係我比较唔中意嘅好烦嘅Elaine Paige）睇下，160，卡拉丝同卡巴叶都係150，唔够钱添！谂嚟谂去，我都係放弃咗卡巴叶，唉，最初嘅目标反而成为放弃，因为卡巴叶精选好多剧目我未听过，三张入面可能剩係得一张我比较熟，算啦。

俾钱折咗279，旁边有个女嘅见我用优惠券，佢冇又呃收银话唔记得带，可唔可以俾折佢，答：唔可以，跟住佢自己穿自己煲，问点样先可以有优惠券，答：消费一次俾一张，佢就决定先买一张再……唔理佢啦，因为张Chess个盒裂晒又花晒，我话检下张碟有冇问题，个哥哥就帮我换埋盒，不过同样係大盒，佢换嘅係中间有齿嘅4碟盒，而我嘅係中间穿嘅2碟盒，所以我问佢要返个旧盒，佢话要收返两个盖去退返去，可以俾返中间个架我，都好啦。（返到屋企发现Chess嘅小册子好残旧，而且污糟晒，简直同二手冇乜分别。）跟住佢叫边栏嘅姐姐拆卡拉丝果张，个姐姐懵懵下唔知做乜，仲要我指示佢知金属防盗条隐蔽暗藏嘅位置叫佢拆，真係唔知係唔係第一日嚟做。哥哥话拆开睇埋碟有冇问题啦，因为係经典嘢，我一听就联想起仓底货，我强制自己唔好表现出任何表情。拆开发现虽然係中价版，但係两边CD上面都铺咗张薄海绵，防止CD从爪牙上面脱落造成损害，包装得好好。

之后我就搭地铁去咗Teen Plaza嘅卓兴买音乐剧Jekyll & Hyde（变身怪医），可能係朝早落雨嘅关系，而且係星期一，今日Teen Plaza好少人，但係卓兴入面就好多人，我喺卓兴又见到KinKi Kids嘅DVD，原嚟係放得隐蔽咗，不过卖280，我冇钱。我攞咗变身怪医就去俾钱，收银嘅姐姐show咗张碟俾其他店员（重新摆一张上架），不过工作人员话冇了，有嘅都摆晒出嚟了。旁边行嚟一个着黄色省音像工作服嘅阿姨过嚟讲，依张好似係BMG买一送一系列，其实我都知依个係BMG嘅69蚊系列，而且前一段时间买一送一，不过我以为已经过咗促销期，不过收银姐姐冇理会，话：唔知啊，由佢啦——我认得依个姐姐，係烂女一个，上次我去买Hyde嘅Single，俾钱果时一路听佢喺到用粗口闹之前嘅顾客。我今日虽然戴住EX70，但係都听到阿姨讲嘅嘢同埋姐姐嘅反应，不过我费事理们，因为就算送，我对依个系列嘅其他CD都冇乜兴趣，而且我费事同烂女争，如果污糟嘅钱可以平息污糟嘅人嘅话，冇所谓，所以我诈听唔到，毫冇反应，就好似个姐姐对阿姨讲嘅嘢面无表情嘅冷漠反应咁样。

行出Teen Plaza发现落梗雨，但係我唔想咁晒钱搭的士了，以前从Teen Plaza返屋企我都係打的，因为对面搭车好麻烦，返到嚟仲要行好长一段路，不过我今日决定搭车。过人行隧道果时见到好多花童，真係，今日星期一，边有情侣出嚟拍拖啊，有都係着校服小情侣嘅，根本唔同佢哋买。

搭上178，我先发觉好失败，因为张变身怪医係Highlight版，我一直都坚持唔晒钱买Highlight版嘅唱片，点知今日咁大意。

落车行返屋企特然好大风，雨唔大，大细密，大风到啲雨打横飞，结果我背脊湿晒但係前面就好干爽，风大到可以推郁人，如果顺风行好轻松。

返到KFC果度，想用优惠券买包鸡爆花食，因为我今日冇食早餐，中午又冇胃口，冇食嘢，亦冇钱出去食，我喺屋企食咗一大碗雪糕就出去了。但係KFC入面虽然好淡，但係就剩係得两个人卖嘢，搞到排队排好耐，有个老坑同两个细路买梗，拣又拣鬼咁耐，又问可唔可以买套餐其中换另一样，梗係唔得啦，送到仲要一袋袋睇过有冇俾少，搞到慢晒，真係想丙佢一镬，另外一边又有条捞嘅靓仔买鬼咁耐，买完又过返嚟加买其他，佢阿妈又过嚟指指点点，真係欠丙，再隔离有个肥婆喺close嘅收银果度想兼队买，但係有个女嘅专登问佢究竟依度係队定係果度係队，肥婆扮低B话唔知，收银听到就明确话佢知果度唔收，个肥婆竟然抱怨话：有没有搞错，站这么久又不是。——我心谂，你后尾先嚟，根本就企得冇我哋耐，兼队仲咁多嘢狡辩，真係又丑又肥又cheap。跟住佢行开之后又企返埋去close嘅收银机果度话：可不可以给我什么什么先，我赶上班啊。——我最憎依啲又丑又肥又捞又乞人憎又cheap嘅捞婆。结果我果条龙嘅收银机好似又有问题，因为果条捞仔同佢阿妈又返嚟兼返去前面加买依样果样，结果拖到慢晒，依啲乡下仔真係乞人憎，成个暴发户咁，成条金链好似铁链咁粗，怀疑係军区嘅捞B，贪赃枉法，最憎依啲招招积积嘅军区捞B嘅了！结果企喺我前面嘅阿伯终于忍唔住，破口大骂收银：搞什么嘛！——点解全部都係捞嘅？我好激气，咁嘅时段都等咁耐，仲要同依啲cheap人一齐癫，我收返埋张优惠券同埋张10蚊转身就走人，同时大声闹：乜西效率！

行过面包店，想买啲点心食，但係谂到寻日食咗佢一个椰撻同埋一个蛋撻，结果依家仲有小小肚痛，所以我都係放弃咗。

返到屋企唯有食饼干，唔知边个咁乞人憎，开咗包我最中意嘅香葱味苏打饼剩係食咗两块就一直放喺果度，搞到露晒风，搞到谂晒，唉，我真係饿咗成日，谂下今晚仲要点呃阿妈话中午去咗边到食……

经过今日，我完全冇晒钱了，我将假期嘅钱全部用晒，过两日上课，中午食饭都唔知边到嚟钱了，或者日日食三文治仲可以捱嘅，但係咁样嘅话我就会每日濒临饿死嘅边缘……特然好想喊，可能依排太多不如意，心情已经够差，谂下之后嘅日子仲更加惨，真係唔知点过……

• 0 Comments

朝早好早起身，因为寻晚头好痛，好早就瞓咗。结果一早就落雨，搞到我冇得出去食早餐。睇咗一朝早电视，补打咗一朝早依到嘅记事，出边终于出阳光了，我准备出去行下了。因为发觉身边都係酒肉朋友，冇着数就请唔郁，唯有带上自己嘅唯一朋友——MD出街了。我之所以咁中意买随身听就係依个原因，只有随声听可以驱除我旅途上嘅孤单感。但係——但係我寻日下昼又唔小心跌咗我部心爱嘅单放落地下，漆都了咗，真係好心痛，今日都係要自己出门0架了～

• 0 Comments