呵呵，补咗篇我觉得几好笑嘅寻日嘅记事。

今日中午我用咗一个钟头，从scnu最偏远嘅一角步行成几公里出去搭车，去咗Teen Plaza嘅卓兴，买咗HYDE嘅三张Single：evergreen、SHALLOW SLEEP、Angel’s tale 。因为我前日买嘅HYDE嘅大碟係全英文，而之前我一路听同睇嘅PV都係日文嘅，我以为英文剩係会喺Single入面先有，Album入面应该係日文版，结果依家Album係全英，我为咗收集返日文版，就唯有买返齐三张Single了，开始以为Single入面会包括纯音乐版，结果冇，每张Single都剩係得一首日文版一首英文版两首歌，三张夹埋一共六首歌，比我预计便，一共用咗200蚊，不过我已经冇钱了，都係靠透支。返嚟听咗下发现入面嘅英文版配乐唔同于Album版，都算係小小惊喜啦。

返到屋企，发现网上终于有『开往春天的地铁』嘅DVD版卖，我即刻订咗。其实我好似係好无意识咁去期待，我都唔知有乜好睇，不过直觉觉得会係比较脱俗嘅商业片，睇下点啦。

• 0 Comments

■说明：由于本文仅为作者个人对其本人的主观小结，为免大家对文中所涉及单位产生不当的误解，所以文中所有单位的名称均被隐去或仅为化名，作者不对读者的自行臆测所造成的任何弯曲误解负任何责任！■

同以往一样，学期初都几积极上进，周围去报班，将全部选修课都试听咗几次，连晚黑追开嘅连续剧『無頭東宮』、『法網伊人』都放弃咗，连卡通『星際漫遊YA YA YA』嘅大结局都错失埋。结果最后因为自己上一学期相关嘅基础科目欠佳，而且难以应付过多依啲较难嘅科目，所以放弃咗，改选咗啲老师好人内容简单嘅科目。

一开学就已经为咗选课嘅事搞到烦晒，忙咗一大轮。之后密密麻麻嘅课程加埋懒个唔叻学人去搞认证，结果真係攰到冇晒办法，自己读书又懒，果啲靠认真理解、数学基础嘅科目攞起几次都係唔明，最尾唯有放弃，结果到咗学期尾就应付唔嚟了。

学校都好耐冇出过乜嘢新闻，其他高校都搞咗几单跳楼自杀、落水溺毙嘅新闻见报，而我哋学校对上一单跳楼已经係放假果时嘅事了，至于学费问题爆发嘅示威事件亦被学校平息，只係喺网上炒咗一轮，并未见报。我哋学校又点可以输蚀俾其他学校呢？话晒市内一只手点都可以数到我哋学校，终于最尾喺期末考搞咗啲全国首创、被传媒誉为“壮观”嘅事件嚟争取咗曝光。

期末考开始后第二日某晚报刊登嘅新闻。

考试第一日当晚GZ电视台新闻亦播出咗当日嘅情况。

当晚电视台新闻播出嘅考试场面，被评为“壮观”。

咁样嘅考试环境确实唔错，空调够劲，光线够猛，台凳够新，空间够宽阔，只係因为体育馆入面喺木质篮球场地板，监考老师又多又中意行嚟行去，结果搞到成日“卜、卜”声好大声嘅脚步声，烦到死，影响晒我哋考试。

听讲考试嘅第一日会有好多记者嚟采访，结果当日剩係见到一个记者喺考场影相，之后考完见到GDTV嘅记者喺到拍我哋攞返考前保管嘅书包。

班记者都唔知采访乜嘅，剩係识影我哋点样逼法去攞书包，剩係识话壮观，唔识得话分析下咁多人嘅考场退场嘅时候剩係开一个门，结果搞到几逼；咁多人考到鬼咁攰，去攞书包仲要咁鬼逼……

电视台记者采访校长

基本上喺边到考都係一样嘅嗟——我起先谂。同时，李铁嘅广告亦不断咁喺电视上面播出：“边到都係主场！”，深入人心（结果证明衰咗）。一开始考场环境确实令我觉得可以舒服咁考试，但係最弊嘅係，佢係唔同科目隔开坐，隔就隔啦，但係佢就係都要学小学、初中咁，两个人两张台拍埋嚟坐，好似喺到话：“俾你哋坐埋一齐睇啦，不过唔同科0架啵，吹咩？”咁。结果之前几科我身边嘅都鬼咁强，死咁答题，简直冇停过笔，而我依边，基本上15分钟之后就将全卷识做嘅都做晒了（因为根本冇几题识做），已经开始停晒手，睇住身边果位咁多嘢写我又唔好意思咁快停手，唯有又重头将啲睇得明题目嘅求其作啲答案落去，点都剩係用多15分钟。通常同我哋搭配坐嘅都係文科或者医学院嘅，啲答题鬼咁多嘢写，而我依边就停晒手，就係因为咁，影响晒我考试嘅情绪，搞到我鬼咁紧张，结果考衰晒。好彩，我喺体育馆考嘅最后一科身边果个好屎，做咗一阵就趴低瞓觉，结果搞到我就源源不断咁答题，成为我喺体育馆入面考得最好嘅唯一一科。

虽然体育馆考场好似好严咁，其实啲老师同果啲学生都好熟，并冇乜严肃嘅感觉，啲监考老师同啲考生都好配合，对于果类学生嚟讲就真係“边到都係主场”了。

（原『学期末小结』大幅删减版）

• 0 Comments

今日一早9点第一批去考咗ccna，同场仲有一两个喺到考mcse，有两部考ccna嘅机都出错，结果佢哋要等一轮先可以考，而我好好彩係硕果仅存嘅两部考ccna嘅机中嘅一部，好顺利咁做题，冇乜题係话唔识嘅，做得都好快，只係实验题配密码唔小心调转咗两个唔同嘅密码，好彩检查咗一次发现咗，即刻改返。原先谂住都冇撞到有争议嘅题目，话唔定可以有1000分满分，结果出成绩嘅时候一眼望错咗说明满分係1000分果行，我疑惑中就望到上面一行说明底分300，再上一行即係第一行先睇到原嚟係987分，都唔知係错咗边题。

食到想食好耐嘅M记新出嘅朱古力脆皮甜桶，果得一般正啦。

考完出嚟去咗揾唔知点解性情大变嘅kaysit行街，真係行得好辛苦好攰。最先去咗HY省音像，点知无意中发现我先前千辛万苦订购返嚟嘅Sunset Boulevard嘅世界首演版出现喺减价碟果度，原价200现价70，变态啊！我订购用咗180，依度竟然先卖70，另外崩溃係因为我一直认为国内好难揾到嚟买，所以先千辛万苦去订购，而且成个订购计划我筹备咗一年半，再有一个崩溃係竟然冇人识货买依套碟，搞到降价降到咁低，简直搞到cheap晒！

今日终于食咗我成两个几月冇食嘅KFC，感觉一般，原先一直好忙，冇时间去食，结果今日可能对住果条友，觉得实在难委咗佢咁，加上佢啲态度又……所以唔係好enjoy。

之后我哋仲去咗农林下路嘅省音像新店，买到Chemistry嘅君をさがしてた～New Jersey United～嘅Single加DVD，果只DVD简直就係本世纪第一只最奢侈嘅DVD，全碟剩係得一只PV，全碟内容剩係得唔到6分钟，虽然果张係D5，咁都应该有4.9G嘅容量，先6分钟PV，冇菜单、冇字幕、冇音效……乜都冇，真係太过分了。另外终于买到我今日行唱片铺嘅主要目的，就係买HYDE嘅个人大碟ROENTGEN，虽然后尾去到卓兴发觉自己买贵咗30蚊，不过都算啦，我係信缘分嘅，依张係我第一张遇到嘅，就注定係我嘅了。结果返嚟听先发觉係全英文版，之前喺网上down啲PV都係日文版，今次发觉英文版真係好听好多，特别係果只EVERGREEN，简直就係为英文而写嘅，太完美太好听了，应该作为全碟嘅主打。

再之后去咗北京路，白行。最后去咗Teen Plaza嘅卓兴、Music Tower同图仪。卓兴有返进口碟卖，好多好新好正，今日终于知道卓兴同省音像嘅关系，原嚟省音像係卓兴嘅供货商，唔怪得卓兴嘅价钱标签、收银单同胶袋都係省音像0架啦。跟住嘅Music Tower同图仪，已经不再吸引，根本就冇乜嘢碟卖，就好似街边嘅低档次唱片店咁，简直垃圾。我最后行返转头去卓兴买咗张EMINEM嘅最新大碟THE EMINEM SHOW就走人了。Kaysit又扭计要兜埋佢返单位，结果兜完去天河北加埋中山一立交塞车，返到屋企楼下都已经5点07分了，果个的士司机鬼咁奸，未到车站我就已经叫定佢车站停0架了，结果到咗车站佢又唔停，叫佢依度停啦都唔停，过咗车站叫佢停佢仲要开多一段先停，越开越远，足足开多差唔多100米，好彩个标冇再跳，佢奸计都冇得逞。之后我一时唔记得要赶住返屋企睇咕噜咕噜魔法阵II，上咗隔离嘅wg买咗张折凳准备过两日上课用。返到屋企已经差唔多4个字了，好彩都睇到大半咕噜咕噜魔法阵II。

之后冲凉有人打电话过嚟，阿妈接咗，阿妈话揾我嘅，我问阿妈：男定女0架？阿妈话：女嘅，谂咗一阵之后我话：讲广州话定係普通话0架？阿妈话：广州话嘅，我叫佢10分钟后再打嚟。——搞错！10分钟之内我有乜可能可以冲完凉！结果真係，佢第二次打嚟，我仲冲梗。我心谂：佢真係有心，咁记得我今日考完试，即刻打电话嚟揾我。——我叫阿妈：同佢讲我今晚再打俾佢啦。阿妈就话俾我听果个人姓乜，我即刻知係边个了，唉，实係又係搞聚会啦。我冲完凉上咗下网先复佢，结果佢话我知junior high school果时嘅某个女同学要去法国留学了，谂住25号叫埋我哋见下面，我又边到有时间呢？佢讲到有啲威胁咁，佢哋个个都谂歪，以为话果个人走我就一定会去见，简直乱咁谂，我好爽快咁话唔得闲同埋多谢佢话我知就收线了。

今晚发觉唔知点解我喺netbig嘅ID又俾人封咗，如果俾我发现真係果个人做嘅话，我真係以后都歧视佢依啲咁嘅人啊！

• 0 Comments

今日得我间u嘅论坛入面嘅某gay名人指引，先得知国内书目最齐全嘅网上书城：北京图书大厦，至于大洋网？死开啲啦！可能我言语之间有踢爆佢断袖之癖，结果即刻唔知俾边个封咗ID，按道理依家我间u嘅论坛坛主空缺，应该冇人有咁嘅权限，唔通……其实佢嘅g事迹大家都知道，都係公开嘅秘密，我亦无歧视之意，从同学口中得知依个人都唔错，而且有啲事好搞笑，我反而想结识佢，言语亦极其善意并避免歧义而被误解，点知落得如此下场……可能係我签名触咗佢痛处？同学话佢中意白嘅男，我签名写“我好黑0架～”，死了，真係衰多手，唯有以后ID解封再同佢解释啦。

之后无意中发现上面嘅订票页面，竟然有我最中意嘅女歌手Tina Arena嘅演唱会！佢嚟中国我竟然唔知！不过可惜係喺北京工人体育馆，而且时间係今年4月30号，一早过晒期，而且我都冇钱去北京…… 枉我依几年辛苦购买Tina Arena嘅唱片，差啲可以揾佢帮手喺啲唱片到签名……不过都係妄想嗟。仲发现有好多音乐会、歌剧演出……北京嘅文娱生活真係太丰富了。上海都係，我都係前一段时间先知原嚟6月下旬Les Misérables（悲惨世界）去咗上海大剧院演出，而且仲係Colm Wilkinson领衔嘅英文版。住喺gz呢？乜都冇。不过我安慰自己，今次悲惨世界未算係真正进入中国，纵观各国演出音乐剧，一定会将佢翻译成自己嘅语言嚟演唱，上海嘅只能算係tour。不过点讲都好，我发现冇钱加上消息唔灵通令我冇咗好多机会（因为前提係冇钱，所以根本冇可能实现，所以叫“冇咗”机会而唔係“错失”机会），真係好失望啊……

• 0 Comments

因为日日都太多压力，太忙，而且有时间都用咗去做无聊嘢，所以搞到日日“补写”。

今日终于收到双光盘Bible，数下日子都剩低唔係好多了。

好伤心，真係好伤心，好伤心。放咗假咁耐我都未曾行过街，今晚睇报纸知道省音像喺农林路开咗旗舰店，又睇到介绍咗我成日去嘅，被我陪伴而成长嘅Music Tower、卓兴、图仪，发觉自己真係好耐冇去Teen Plaza楼上嘅卓兴同图仪了，唔知係唔係有返进口CD卖，Teen Plaza我已经係连续两个几月几过其门而不入了，而HY二楼嘅老板娘我都好耐冇去睇过。报纸又登咗北京路某处嘅唱片店…… 但係，但係，但係依家，可以有乜办法啊？双亲剩係识无情冷淡咁威逼我，一啲都唔了解我嘅苦处，成个假期已经冇晒了，我依家真係计划唔出时间去行一次我中意嘅商铺，真係冇了，或者18、19、20号可以，但係果三日係我唯一嘅假日了，如果再计划使用，咁仲叫放假咩？总之好伤心，欲哭无泪……

• 0 Comments

觉得太辛苦了，加上中午果餐环境太差，所以决定几日剩係上半日就算了。着住硬底鞋，跑咗成差唔多300米先追到部197返屋企，好彩无耐就有位坐。返到屋企，由于病痛缠身，剩係整返热朝早食剩嘅粥嚟当餐。最开心就係有得睇咕噜咕噜魔法阵II，不过咁样嘅日子已经唔多了。我唯一可能得闲嘅8号，亲戚竟然话要嚟我屋企，咁即係我依个假期已经彻底玩完……

• 0 Comments

真係好辛苦，去上bw一坐就坐咗成日。因为第一次去，惊冇位，所以朝早5点9就起咗身，6点9就出发了，去到jnu先7点1，结果等埋同学先入scnu，一路都有bw嘅指示牌，好似探险咁跟住行，同路嘅仲有wd嘅指示牌。结果去到音乐厅坐低先7点9，原嚟係按号入坐，我哋即刻决定以后都唔咁早嚟了。跟住音乐厅先开灯开空调，我同同学一路讲无聊嘢一路等上课，点知坐到8点几就快上课果时（8点半上课）突然冇咗电，唯有一路等佢哋处理。又係一路坐，到差唔多10点都係冇电，佢哋唯有攞果啲一般老师上课用嘅手提音箱加咪嚟讲课，可能因为係音乐厅，所以音效都唔错，不过唔知点解果到成日有水管声，“呜呜呜”咁，点用嚟听音乐啊？环境真係好辛苦，因为冇电，所以冇空调，热到死，撞啱我又唔记得带扇，而且得凳冇台，成日低头写嘢，条颈真係就快断了。结果12点落课后bw负责任决定下昼临时搬去gdut本部上课，一点开车接送，佢讲完冇耐突然有返电，不过因为已经有部分人散咗场，虽然大部分人都话留返喺到上，但係惊有人通知唔到，负责人都係冇改变决定。

我哋唯有去咗饭堂快快脆食饭，我要咗个三鲜桂林米粉，放低喺台就去揾地方洗手，结果揾极都冇，问饭堂员工，佢指我去厨房果条路，不过我认为厨房重地，所以都係唔敢入，我又行出饭堂揾，结果都係揾唔到，唯有打破晒我饭前洗手嘅习惯，用纸巾干洗咗嚟食，真係好唔舒服。

一点几车就开出，去到gdut本部嘅学生活动中心坐低先一点三，结果又係坐到两点先上课，最激气就係果啲好似民工咁嘅gdut电教员喺个调音台到死搞，上课前同课间休息死咁大声咁播啲国语歌同闽南话歌，难听到死又吵，鬼咁大声，搞到我哋想休息都休息唔到。Gdut嘅学生活动中心都係冇台嘅，结果一样辛苦。冇台唔单止写嘢辛苦，最辛苦就係因为我逢课必瞌眼瞓嘅习惯，根本就冇地方可以俾我依靠到嚟摆姿势瞌眼瞓，而且啲位又逼又窄，放脚都辛苦，真係死人咁滞。终于到6点落课，成300人步出gdut，起码百几人喺车站等车，佢哋搭果啲车真係逼死，好彩我唯一可以搭返屋企嘅522虽然逼，但係未到逼死嘅程度，而且有空调。但係我企下企下，只脚竟然抽筋，真係好惨啊～ 返到屋企依边都即刻有部好难等到嘅183，等我即刻可以驳到车返到屋企门口。

真係好辛苦，我已经开始动摇了……

• 0 Comments

今日专登早啲起身去邮局寄返有问题嘅两张VCD俾北京换货，8点半我就起咗身，结果准时下昼2点3出发去邮局～（因为太懒郁了）

我係第一次自己寄包裹，所以乜都要问果个邮局嘅肥阿姨，好彩佢都有耐性。包咗入盒，肥阿姨又叫我喺盒面写地址，我好奇怪，已经写咗单落，仲要喺盒到写，就问佢係写收货人地址定係寄货人地址，佢话两个都写。我犹豫咗一阵，又问：得一个位，点写两个啊？佢答，上面写收件，下面写寄件。我一睇，係啵，即刻答：係啵，係啵，同信封一样～ 我觉得真係好鬼瘀啊，咁都唔识嚟问，我一向都成日斥责人哋冇社会经验，自己未又係咁，仲要成日俾人呃都唔敢出声。结果复印货单用咗一蚊，其实根本唔使一蚊，A3纸点使一蚊，果个商店嘅捞婆自己部烂鬼复印机食纸，印坏咗一张又嚟入我数，梗係见我成个中学生咁嘅样好好虾，不过我懒得为咗小小钱同啲捞婆争执，简直有失身份，而且捞地头，费事有危险…… 邮局寄费又用咗7蚊3，真係蚀晒，以后都唔上网买嘢了，隔山买牛，冇得拣，退换又麻烦。

喺屋企休息咗个几星期冇出街，一出街就觉得好精神，全身有力，行步路都醒目啲，但係行咗15分钟之后，我就开始攰了，跟住仲成身酸痛，唉～～ 不过回程嘅时候经过发廊，发现同我飞开发嘅飞发哥哥返咗嚟做，我都开心返小小。

• 0 Comments

今日终于攞到joyo嘅包裹，老窦自己几日冇开信箱结果迟咗领包裹俾罚咗两蚊反而嚟闹我话我唔话佢知有包裹收，我又点知咁快收到啵。

有啲后悔一次买咁多嘢，先便果小小，结果果两本『音乐圣经』有小小烂、旧、污糟，话晒都係贵嘢，好心痛，早知去购书中心买就算啦，贪果便10蚊，冇得拣。而且我买嘅廿几张碟大部分嘅碟盒都压烂晒，真係好激气。好多碟都冇乜心情睇，好多都好失望。唯一兴奋嘅就係『舒克和贝塔』嘅卡通超乎好想象，美工好好，配音、动作、人物性格可爱，我真係好中意果两只老鼠，俾米奇老鼠果啲好唔知几多N嘅N次方倍。觉得果两只老鼠真係好有型，比较奇怪嘅就係我竟然有觉得佢哋“靓仔”嘅感觉。但係、但係、但係、但係竟然一套六张嘅VCD有两张完全读唔到碟，无论係喺DVD Player定係CD Rom都读唔出，激死我了，搞到仲要我听日去邮局寄返去北京换货，早知喺广州大洋网音像城买就算了。我打算迟啲去文一买返啲纸粘土，同依两只老鼠做首办模型。

今日出智慧牙嘅地方又痛，係喉咙痛嘅先兆，都係因为依排太夜瞓，搞到有虚火。仲有今日又整趁手指甲下面嘅肉，真係好鬼痛，特别係湿水果时。总之黑仔就係啦～

仲有，我俾joyo登上首页嘅评论终于喺今日唔知几时落咗画了～

• 0 Comments

依几日复习加放假真係好脱离社会：

朝早11点起床，睇半个钟电视同时开电脑开始online；

11点半煮落饭，跟住去刷牙洗面（如果唔係要煮饭我先唔咁早起床）；

12点拣一出DVD边睇边食饭，12点半老窦睇新闻，唯有关DVD；

1点开始上网，接近两点实在顶唔顺，去瞓中午觉，依个时候出边落大雨；

接近3点半醒咗，上网，顶唔顺，再瞓；

4点后起身，上网；

5点，星期一三五去睇卡通咕噜咕噜魔法阵，星期二四上网；

5点半，收衫，上网，开音响；

6点后，冲凉，45分钟之后冲完凉，睇报纸，上网；

7点半，食饭；

8点后返入房上网，接近9点实在顶唔顺，瞓第二次中午觉；

11点瞓醒觉，饮杯Qoo或者饮樽达能酸乳酪，上网；

1点，开始上机复习CCNA，15分钟后改为浏览网页；

2点半，决心开始认真复习CCNA，15分钟后视察啱啱睇过嘅网站有冇更新，依个时候出边第二次落雨；

3点半，虽然唔眼瞓，但係费事俾家长闹，唯有去刷牙洗面准备瞓觉；

差唔多4点了，熄灯上床，辗转一轮，唔知几点瞓着；

朝早11点，赶住煮饭，唯有起床……

几日冇睇邮箱，今日老窦先开邮箱，收到我喺joyo买嘅嘢嘅包裹通知单，通知单邮戳係7月25号收到，竟然过咗四日，如果早啲发现我上个周末就可以有娱乐了。

啱啱写依篇嘢嘅时候，有只有翼嘅曱甴爬咗入我房，又爬入我床底，吓死我了，因为屋企人瞓晒觉，揾唔到人帮我打咗佢。好在可能係因为我房干净，而且空调开得太冻，只曱甴顶唔顺，从门嚹爬返出去，我即时安乐晒～

• 0 Comments